Meeqqat tallimmeereersut akiuussusertipput
Nuummi meeqqat tallimaniit aqqanillit tungaannut ukiullit, ulluni 30-ni kingullerni tunillatsissimanngitsut angerlarsimaffimminnilu tunillatsissimasumut maanna qanigisaasuunngitsut, akiuussutissamik ullumi kapineqarput.
Nuummi meeqqat tallimaniit aqqanillit tungaannut ukiullit Inussivimmi coronavirusimut akiuussuserneqarnissamut ullumi neqeroorfigineqarput.
Nunatsinni meeqqat taama ukiullit siullermeerlutik coronavirusimut akiuussusertipput.
Nunatta nakorsaanerata tunillaassuunnerup pinaveersaartinnissaa pillugu meeqqat akiuussuserneqarnissaat innersuussutigereerpaa.
- Meeqqat akiuussuserneqarnissaat innersuussutigaarput pitsaanerusumik nappaalanersuarmik nakkutiginnissinnaalerniassagatta, maannakkut meeqqat ukiukitsut akornanni tuniluunneq annertusiartortillugu. Naak meeqqat qaqutiguinnaq Covid-19-imik sakkortuumik napparsimalertaraluartut, tuniluutsitsineq annikillisinneqarsinnaavoq taamaalillunilu allat illersorneqarlutik, nakorsaaneq Henrik L. Hansen oqarpoq.
Meeqqat akiuussusertittut sapaatit akunneri pingasut qaangiunnerini aappassaanik akiuussuserneqassapput.
Ilisimatusartut isumaqatigiinngitsut
Danmarkimi peqqissutsimut aqutsisoqarfiup, nunat allat arlallit assiglagit, meeqqat coronavirusimut akiuussuserneqarnissaat innersuussutigaat. Ilisimatusarnikkulli isumaqatigiinngitsoqarpoq, apeqquserneqarlunilu meeqqat sakkortuumik napparsimalertanngippata sooq akiuussuserneqassanersut.
Nunatsinni akiuussusiinissaq aamma innersuussutaavoq. Ilisimatusartulli ilaasa tunillatsinnikkut nammineq illersuuteqalernissaq aqqutissaanersoq ilaatigut aamma isummerfigisimavaat.
Christine Stabell Benn, Syddansk Universitetimi nunarsuaq tamakkerlugu peqqissutsimut tunngatillugu professori isumaqarpoq meeqqat tunillatsinnikkut illersuuteqalernissaat pitsaanerussagunartoq, akiuussusertinnermiit. Berlingskep allaaserisaani taama oqarpoq:
- Oqarusuppunga tunillatsereernikkut omikronimut allamulluunniit coronap allannguutissaanut illersuut pitsaanerussasoq, Berlingskep allaaserisaani oqarpoq.
Nuummi ukioqatigiiaat illersuuteqarlualereersut
Allaaserisami tassani Anton Pottegård, Syddansk Universitetimi nappaalanersuaqarneranut nakorsaatinullu ilisimatusartoq aamma issuarneqarpoq. Taanna isumaqarpoq tunillatsinnikkut illersuuteqalernissamut periarfissaq maannakkorpiaq atorneqassappat inuiaqatigiinnut akisuallaassasoq.
- Ilumoorpoq ilisimanngisagut amerlapput – ilisimariikkagulli malissagutsigit isumatusaarneruvoq akiuussusertinnissaq, oqarpoq.
Nunatta Nakorsaanera Henrik L. Hansen ataasinngornermi tusagassiortunik katersortitsinermi oqarpoq Nuummi meeqqat tallimaniit qulingiluanik ukiullit akornanni 35 procentii tunillatsissimalersut. Tassa Nuummi meeqqat 5-9-nik ukiullit 1222-iusuni 428-t.
Nunatta Nakorsaanera tassunga atatillugu ukioqatigiiaat taakku akornanni tunillatsereersimanermi namminne covid-19-imut illersuuteqalernissaat qanittuaranngortoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...