Meeqqat
Meeqqat sanngiinnerusut inatsisissap nukittorsassavai
Nunatsinni kommuneqarfiit tikeraartarnerisigut paasinarsisimavoq meeqqat inuusuttulli sanngiinnerusut pisariaqartitaminnik ikiorneqarneq ajortut. Tamannalu inatsisissamik siunnersuuteqarnikkut meeqqat pisinnaatitaaffii nukittorsarniarlugit meeqqat sanngiinnerusut inersimasutut ikaarsaariarneranni nukittorsaavigineqarniarpoq.
Inatsisissamut siunnersuut Inatsisartut upernaakkut ataatsimiinneranni siullermeerutaasumik suliarineqartussaq, Isumaginninnermut, Ilaqutariinnut, Naligiisitaanermut Inatsisinulli atuutitsinermut Naalakkersuisup Sara Olsvigip siunnersuutigaa.
Inatsit ammalukullaasoq
Inatsississamut siunnersuut annertuvoq, siunnersuummi meeqqat illersorneqarnerulernissaat ikiorneqarnerulernissaallu anguniangaalluni "meeqqat aarlerinartorsiortut inuiaqatigiinniillu tapersersorneqarnissamik pisariaqartitsisut", Sara Olsvigip oqarneratut.
Inatsisissamut siunnersuummit tigulaangaq:
Meeqqat naligiisitaanerat qulakkeerneqassaaq, meeqqallu pisariaqartitaat aallaavigalugit tapersersuineq pissalluni.
Taamatuttaaq kommunalbestyrelsit peqquneqarput sukumiisumik sullissinissaq pillugu suliaqarnissaq aalajangersimasumik piffissalertassagaat, assersuutigalugu sumiginnaaneq il. il. pillugit nalunaaruteqartoqarsimatillugu.
Namminersorlutik Oqartussat Kommuninilu ingerlatsiviit siunnersuut aqqutigalugu peqquneqarput namminneq suliniuteqarnermikkut ujartuisarnermikkullu suliaqartassasut.
Kiisalu inatsisissatut siunnersuummi kinguneqartitsisarnissamik aalajangersakkat ilanngunneqarput, Aalajangersakkat taakku kommunalbestyrelsip akisussaaffimminik naammassinninngiffigisaani atorneqarsinnaapput. Assersuutigalugu, meeqqamik isumassortarialimmik pasitsaassinermik nalunaarutiginnittoqarneraniit suliarinninnissaq akunnerit 24-t qaangiutsinnagit aallartinneqarsimanngikkaangat.
Inatsisissatut siunnersuutip assigiinngitsutigut ilanngussivigaa Naalagaaffiit Peqatigiit Meeqqat pillugit isumaqatigiissutaat, soorlu meeqqap imminut tunngasuni suliani tusarniarneqartarnissaa.
Kommunini ingerlatsinermi akisussaaffiup sumiinnera ersarissumik inissinneqassaaq.
Kommunit sumiiffinni meeqqamut tapersiinissap pitsaanerpaap tapersiissutiginissaa namminneq aalajangersinnaanngorpaat, tamannali ilutigalugu pisussaaffeqarnermik aamma malitseqarluni.
Naalakkersuisut aamma pisussaaffilerneqarput, tassunga ilanngullugu isumaginninnikkut sulinermi atortussanik kommunit atorsinnaasaannik suliaqarnissamut aamma suliani meeqqanut tunngasuni sullissinermi malittarisassat eqqornerusut aalajangersarnissaannut
Nuna tamakkerlugu nalunaaruteqartarfimmik pilerstisisoqassaaq
Nalunaaruteqartarfiup meerarpassuit inissinneqarsimasut 18-iliigaangamik inersimasutut ingerlalluartumik inuuneqarnermut ikaarsaariartarnissaannut nukittorsaataassaaq.
Kommunit angajoqqaanngortussanut tapersersuinissamik neqerooruteqartassapput, angajoqqaat inuuneqarpata meeqqap suli inunngunngitsup alliartorneranut, peqqissusaanut ineriartorneranulluunniit ajoqutaasinnaasumik.
Suliniuterpassuit meeqqanut sumiginnakkanut aningaasaliissutaasartut amerlineqarnissaannik malitseqassaaq. Assersuutigaluguu malitseqartitsisarnerup nukittorsarnissaanut 6,7 mio koruuninik aningaasartuuteqarnerulernissamik malitseqassaaq. Akiuniarnermi neqeroorutinut aningaasartuutissatut 6,5 mio koruuniussasut ilimagineqarpoq. Kommunilli piffissamik aalajangersimasumik iliuuseqartarnissaannut piumasaqaatitalik ukiumut 4 mio koruuninik qaavasigut aningaasartuuteqarnerulissasut ilimagineqarluni.
Suliuniutilli allat nunatta karsianut aamma aningaasaqarneranut kalluaassapput
Siunnersuut Inatsisartuni amerlanerussuteqartuni akuerineqassappat, ukioq manna maajip 29-ani pingajussaanik suliarineqassaaq. Siunnersuut sisamanngornermi ullup qeqqata missaani siullermeerutaasumik eqqartorneqassaaq.