Meeqqat pisinnaatitaaffiinut iliuusissatut pilersaarut nutaaq akuerineqartoq
Naalagaaffiit Peqatigiit (NP) Meeqqat pillugit Isumaqatigiissutaannik Kalaallit Nunaata qanoq malinninnissaanut iliuusissatut pilersaarusiortoqassaaq. Inatsisartunit tamanna akuerineqarpoq. Illuatungiliuttut partiiani ernummatigineqarpoq, allaffissornikkut nutaamik suliniuteqaqqittoqarnissaa.
Suliniuterpassuit nunami maani meeqqat atugaannik pitsanngorsaasussat ukiuni kingullerni akuerineqartarput. Suliniutit tamakku ilaatigut ilagaat, meeqqat tapersersorneqarnissaannut inatsit nutaaq kiisalu meeqqat inuusuttullu sumiginnagaasarnerisa annikillisarneqarnissaanut nuna tamakkerlugu iliuusissatut pilersaarut.
Pingasunngormat politkkerit aalajangiipput, susassaqarfimmi nutaamik pilersaarusiortoqaqqissasoq. Tamatumuuna Meeqqat pisinnaatitaaffii pillugut NP-p isumaqatigiissutaanik malinninnissaq pillugu - aamma Meeqqat pillugit isumaqatigiissummik taaneqartartoq.
- Naalagaaffiit Peqatigiit (NP) Meeqqat pillugit Isumaqatigiissutaata tamarmiusup Kalaallit Nunaanni tamarmi atuutsinneqarlernissaa anguniarlugu, Naalakkersuisut suliaqaqqullugit peqquneqassasut, Siumut Inatsisartuni gruppiata siunnersuutaanni allassimavoq.
Meeqqat pillugit isumaqatigiissut politikkerinut assoroortitsiniarpasippoq, siusinnerusukkumi misussueqqissaarnermi nalilerneqarsimavoq, Meeqqat pillugit isumaqatigiissut Kalaallit Nunaanni inatsisinut ilanngunneqassappat 320 millioner koruunit missaannik akeqassasoq.
Kigutinik narlorsaasarneq taamaatinneqartoq
Suliaq Ilaqutariinnermut Peqqissutsimullu Ataatsimiititaliami suliarineqarsimavoq, aningaasartuutissallu pissutigalugit Meeqqat pillugit isumaqatigiissutip inatsisinut ilanngunneqarsinnaannginneranik Naalakkersuisut isumaqarnerannut, ataatsimiititaliami politikkerit isumaqataapput.
Ataatsimiititaliamilli aalajangiussimaneqarpoq, Meeqqat pillugit isumaqatigiissummik malinninnissap piffissap ingerlanerani qanoq anguneqarsinnaaneranut pilersaarusiortoqarnissaa.
Siunnersuut marlunngornermi Inatsartut inaarutaasumik suliarimmassuk, Inatsisartuni partiinit tapersersorluarneqarpoq, aammali isornartorsiuisoqarluni.
Hans Enoksenip Partii Naleqqameersup oqaatigaa, meeqqat kigutiminnik narlorsartinnissamut periarfissaat atorunnaarsinneqaqqammersorlu siunnersuut akuerineqartoq:
Allaffissornikkut suliniut alla aamma?
- Meeqqat sipaarniarfiginasigit, Enoksen oqarpoq.
Suleqatigiissitsisuneersup Tillie Martinussenip aamma siunnersuut tapersersorpaa, eqqarsarnartoqartilluguli iliuusissatut pilersaarut alla aamma meeqqat atugaannik pitsaanerulersitsivissanersoq:
- Peqqissaarullugu aaqqissuunneqanngippat ernummatigaara, tamanna allaffissornikkut suliniutaaginnassasoraasiit, Tiliie Martinussen oqarpoq.
Erik Jensenip Siumumeersup oqaluttarfimmit arlaleriarluni neriorsuutigaa, oqaaserineqartut piviusunngortinniarlugit Siumut piareeqqasoq, aamma iliuusissatut pilersaarutip malitsigisaanik pitsanngorsaatissatut siunnersuutigineqarsinnaasunut aningaasaliissuteqarnissamut.