Meeqqat pisinnaatitaaffiinik qulakkeerinnissaagut

Meeqqat illersuisortaariligaattut juunip aallaqqaataani meeqqat ulluanni meeqqat tamakkerlugit pilluaqquakka.

Meeqqat nunatsinni tassaapput inuttut, ilaqutariinni aammalu siunissami pisuussutitta pingaarnersaat, Aviâja Egede Lynge oqarpoq.

- Taamaammat aamma meeqqat kikkuugaluarunik, qanorluunniit kinaassuseqaraluarunik tunuliaquteqaraluarunilluunniit assigiimmik pitsaasumik inuuneqarnissaminnut, iliuuseqarfigineqarnissaminnik, ineriartornissaminnullu assigiinngisitsinertaqanngitsumik periarfissinneqartussaapput. Taassuma qulakkeerneqarnissaa meeqqat illersuisuattut suliarinissaa qilanaareqaara. Tassungalu atatillugu meeqqat siunnersuisuilu piffissami qanittumi suliniutissatta sammivilersornissaa qilanaaraara, meeqqat illersuisortaavat erseqqissaavoq.

- Inuusaasitsinni meeqqat pingaartittaqaagut aamma nuannaarutigisaqalugit. Meeqqanulli pingaartitsinerput tamatigut iliuuserisartakkatsinnut oqimaaqatigiittumik inerneqartarnissaa pingaaruteqarluinnarpoq. Taamatuttaaq meeqqat tusaaneqarnissaat takuneqarnissaallu qitiulluinnarpoq. Naligalugimmi paasinngikkutsigit aamma aalajangiinigut iliuutsigullu meeqqat pisinnaatitaaffiinut naapertuutinngitsoorsinnaasarmata. Taamaammat, angajoqqaajugutta, meeqqanut sullissisuugutta, meeqqanut tunngasunik inatsisiliortuugutta allatigullu meeqqanut tunngasunik suliaqartuugutta tamatigut ”meeqqat isaanniit” takunnissinnaanissaq pingaaruteqarluinnarpoq, Aviâja Egede Lynge oqarpoq,ukiunilu 3-ni tulliuttuni sulinissani qilanaarinerarlugu taamatuttaaq ukiuni taakkunani meeqqat, inuusuttuaqqat inersimasullu Kalaallit Nunaat tamakkerlugu oqaloqatigisarnissaannut.