Meeqqat pisinnaatitaaffii Nunatta unioqqajaavai

Angajoqqaat meeqqanut oqartussaanerat pillugu inatsit atuuttoq malillugu angajoqqaat katissimanngitsut qimanneranni anaanaasoq meeqqanut akisussaasunngortuaannangajappoq. Inatsit tamanna pisoqalisoortoq FN-llu meeqqat pisinnaatitaaffiinik aalajangersagaanut naapertuutinngitsoq meeqqat oqaaseqartartuat Aaja Chemnitz Larsen isumaqarpoq.

Angajoqqaanut oqartussaanermut inatsit Nunatsinni atuuttoq 1993-meersuuvoq. Taanna malillugu angajoqqaat katissimanngitsut qimanneranni ingerlaannartumi anaanaasoq qitornanut qulinik suli ukioqalersimanngitsunut oqartussaatitaalersarpoq. Tamatuma ataataasup qitornamut attaveqarnera siunissaanullu sunniuteqaqataasinnaanera killilertarpaa.

Periuseq naleqqutinngitsoq

- Namminersorsinnaanermik inatsit siulleq maanna atuuttoq FN-p Meeqqat pisinnaatitaaffii pillugit isumaqatigiissutaata Kalaallit Nunaanni atuutilinngikkallarmalli inatsisiliaavoq, tamannalu isumaqarpoq maanna inatsimmi atuuttumi naliliiffigineqarsimanngitsoq meeqqat pisinnaatitaaffii sorliit naammassissallugit Kalaallit Nunaat imminut pisussangortissimanersoq, meeqqat oqaaseqartartuat Aaja Chemnitz Larsen oqarpoq.

FNip meeqqat pisinnaatitaaffii pillugit aalangersagaani allassimavoq aalajangiinnerni meeqqamut tunngassuteqartuni meeraq tusaaniarneqartassasoq.

- Ajorluinnarpoq inatsiseqaratta soorlu Naalagaaffiit Peqatigiit Meeqqat pillugit isumaqatigiissutaani allaqqasumi, meeqqanik qassinilluunniit ukioqaraluarpata tusarneqarsinnaaneranik periarfissiisinnaanngitsumik, akerlianilli meeqqap inerissimassusaa immikkullu naliliiffigineqarnera aallaavigalugu tusarneqarnissaanik pisinnaatitsisumik, Aaja Chemnitz Larsen oqarpoq.

Angajoqqaat oqartussaanerat pillugu inatsisiliortut tassaapput Folketingi. Taamaammat Aaja Chemnitz Larsenip Naalakkersuisut kaammattorpai inatsisip allanngortinneqarnissaa siunertaralugu Danmarkimi naalakkersuisunut sunniiniaqqullugit.