Meeqqat pinnguartut angummik toqungasumik nassaartut

Meeqqat sisamat Nuummi Qapiarfiusaami, blok 17-ip eqqaani ataasinngornermi ualikkut aneertillutik angummik toqungasumik nassaarput. Misissuinerit qulakkeerpaat nassaarineqartoq tassaasoq 32-nik ukiulik Amos Jonassen, 7. december 2022 tammaaneqarluni nalunaarutigineqarsimasoq.

Kalaallit Nunaata Politiivisa misissuinerisa qulakkeerpaat toqusoqarnerani pinerluttoqarsimanngitsoq.

- Timip toqungasup misissornerani, nassaarfiullu misissornerani qulakkeerneqarpoq toqusoqarnerani pinerluttoqarsimanngitsoq, politiit tusagassiorfinnut nalunaaruteqarlutik allapput.

Timi nassaarineqartoq marlunngornermi ullaap tungaani napparsimmavimmi misissorneqarpoq. Timip misissorneqara, nassaarfiup misissuineranut sanillersuunneqarpoq. Naliliinerlu tassaavoq angut "ajoraluartumik pisoqarnerani toqusimasoq". Toqusoqarnerani pisut politiit itisilerusunngilaat, qimagaasut innimigineqassammata.

Meeqqat pinartoqartillugu ikiuigasuarnermik oqaloqatigineqartut

Kalaallit Nunaata Politiivi ilisimatitsipput meeqqat timimik toqungasumik nassaartut, nassaartoqareernerata kinguninngua pinartoqartillugu tarnikkut ikiuigasuartussanik oqaloqatigineqarsimasut.

- Meeqqat timimik toqungasumik taamatut nassaarnerat soorunami meeqqanut sakkortuvoq. Taama pisoqareernerani tarnikkut ikiuigasuartussanik oqaloqateqarnissamik neqeroorfigineqarput, politikommissær Malik Sandgreen, Kalaallit Nunaata Politiivini paasiniaasartut immikkoortortaqarfiani pisortaasoq oqaaseqarpoq nangillunilu:

- Tarnip nakorsaanik ikiuigasuarluni oqaloqatiginninnissamik neqeroorfigineqarput. Taamatullu ilaqutaasut meeqqat nassaareernerminni qisuariaateqalerpata iluaqutigisinnaasaat pillugit oqaloqatigineqarnissamik neqeroorfigineqarlutik, politikommissær Malik Sandgreen oqarpoq.

Suliaq pillugu Kalaallit Nunaata Politiivi annerusumik oqaaseqassanngillat.