Meeqqat pillugit suliassaqarfik: Danskit Qeqqata Kommunianut ikiuukkiartulersut

Qeqqata Kommunia Danmarkimi kommuninik marlunnik suleqateqarpoq, taakku Sisimiunit meeqqanut inuusuttunullu tunngatillugit suliassaqarfimmi suliaqarnermut ikiuutissapput.

Qeqqata Kommuniani, pingaartumik Sisimiuni meeqqanut inuusuttunullu tunngatillugit sullissisussanik annertuumik pisariaqartitsisoqarpoq.

Sisimiuni Maniitsumilu sullissisumut ataatsimut suliat amerlassusaannik misissuinerup, 2019-imi qaammatinik pingasukkaarinerup aappaani ingerlanneqartup takutippaa, Sisimiuni sullissisumut ataatsimut suliat amerlassusaa 98,7-iusoq, Maniitsumi sullissisumut ataatsimut 28,2-iusoq.

- Taassuma paasinarsitippaa, sullissisut marloriataannik pisariaqartitsisoqartoq, sullissisumut ataatsimut suliassat 25-35 suliat amerlassusissaattut missingiutaasoq malissagaanni, Qeqqata Kommuniani kommunalbestyrelsip ataatsimiinnermi oqaluuserisassaani allassimavoq.

Danmarkimi kommuninik marlunnik suleqateqarneq

Suliniutinik annertusaaneq tunngavigalugu Qeqqata Kommuniata Namminersorlutik Oqartussanik suleqateqarluni, Randers Kommune aamma Københavns Kommune isumaginninnermut meeqqanullu tunngasunik suleqatigiinnissamik isumaqatigiissusiorfigisimavai.

- Randers Kommunemik suleqatigiinnissamik isumaqatigiissut piffissami 2020-mi septembarip aallaqqaataaniit - decembarip qeqqata tungaanut atuuppoq aammalu Københavns Kommunemik suleqatigiinnissamik isumaqatigiissut piffissami 2020-mi septembarip aallaqqaataaniit - 2021-imi septembarip aallaqqaataanut atuuppoq, kommunimit ilisimatitsissutigineqarpoq.

Aallartisaalluni ataatsimiinneq

Suleqatigiinnissamik isumaqatigiissuteqarnermi siunertaasoq tassaavoq, ilaatigut Randers Kommunemit aamma Københavns Kommunemit sulisuusunik piffissami killilikkami Qeqqata Kommunianut nassiussinikkut Qeqqata Kommuniani sulisunik nukittorsaanissaq aammalu ilaatigut misilittakkanik avitseqatigiinnikkut sanileriillunilu ilinniartitsinikkut Qeqqata Kommuniata nammineq sulisuisa suliamikkut pitsanngorsarneqarnissaat.

- Randers Kommunemit aamma Københavns Kommunemit suleqataasut, isumaginninnikkut siunnersortaasuusussat aamma ilaqutariinnik katsorsaasuusussat, Kalaallit Nunaannut aallannginnerminni aallartisaalluni ataatsimiinnernik ingerlatsissapput. Aallartisarluni ataatsimiinerit ilaatigut kalaallit kulturianni, inatsisaannik kommunillu suliassaanik naapitsinissamut pineqartunut piareersaataassaaq, kommunimit oqaatigineqarpoq.

Siorna Danmarkimit 80 millioner koruunit immikkoortinneqarput, taakku kalaallit meerartaannik immikkut ittumik ikiuinissamut ukiuni sisamani atuuttussanngorlugit agguataarneqarsimapput.

Powered by Labrador CMS