meeqqat inuusuttullu
"Meeqqat pillugit oqaluttuanik nuannersunik amingaateqarpunga"
-Ilaqutariippassuit Nunatsinni ajunngitsumik ingerlapput, taakkuli tusarfigineqarneq ajorput. Qanoq iluartigissagaluarpa meeqqat illersuisuata eqqaallattaaleraluarunigit, Atassutip Inuusuttaasa siulittaasua oqarpoq.
Atassutip Inuusuttaasa Siulittaasua Aqqalu Jerimiassen meeqqat pillugit nutaarsiassanik ajunngitsunik ujartuivoq.
- Ulluinnarni meeqqat sumiginnakkat amerlasuullu kaattut tusartuartarpavut. Tassani meeqqat illersuisuanit (Aviâja Egede Lynge aaqq.) amigaatigaara, oqaaseqalaartarsinnaanera angajoqqaat ajunngitsumik ingerlasut pillugit, tusagassiortunik katersuititsinermi Aqqalu Jerimiassen taama allappoq.
Meeqqat aamma sunnertittarput
Oqaluttuat nuannersut aamma saqqummiutissallugit pingaaruteqartoq isumaqarpoq.
- Meeqqat nutaarsiassat aamma tusarnaartarpaat oqallisigineqartunullu sunnertinneqartarsimassallutik. Ilisimavara angajoqqaat tamarmik meeqqat pisinnaatitaaffii malissinnaanngikkaat taamaattorli neriuutigaara meeqqat illersuisua maligassiortunik oqaaseqallattaalerumaartoq, taakkartorlugillu suut pissutaallutik ulluinnarni ajunngitsumik ingerlasoqarnersoq, Aqqalu Jerimiassen taama oqarpoq.
Oqaluttuat nuannersut amerlanerit
Tassannga angajoqqaat tapersersortariallit iluaqutigissavaat, naqissusiivoq.
- Neriuppunga meeqqat angajoqqaallu pillugit oqaluttuat nuannersut amerlanerit saqqummerumaartut, tassannga assersuusioqataasinnaammata ulluinnarni qanoq ilioraanni ajunngittuunersoq, tassuunatigut tapersersortariallit ikiorneqarsinnaammata Aqqalu Jerimiassen oqarpoq.