Meeqqat oqaaseqartartuat neriulluartoq

Naalagaaffiit Peqatigiit Meeqqat pillugit isumaqatigiissutaata tamarmiusup Kalaallit Nunaani tamarmi atuutsinneqalernissaata piviusunngortinneqarnissaa, naalakkersuisunngortullu nutaat suleqatigilernissaat eqqarsaatigalugu Meeqqat Illersuisuata Aviâja Egede Lyngep siunissamut neriuuteqarlualersippaa.

Meeqqat Illersuisuata Aviâja Egede Lyngep politikerinik suleqateqarnerminik ingerlateqqiinissaminik qilanaarpoq, pingaartumillu qinigaaffiup aggersup ingerlanerani Naalagaaffiit Peqatigiit Meeqqat pillugit isumaqatigiissutaata tamarmiusup Kalaallit Nunaanni atuutsinneqalernissaa anguniarneqassaa aallartinneqartussaammat.

Kommunalbestyrelsinut Naalakkersuisunullu isumaqatiginninniarnerit ingerlaleruttorneranni, Meeqqat Illersuisuat Aviâja Egede Lynge qinikkanik suleqateqaleqqinnissaminik qilanaalereerpoq, aviisi Sermitsiaq allappoq.

Inatsisartuni partiit tamarmiullutik Naalagaaffiit Peqatigiit Meeqqat pillugit isumaqatigiissutaata tamarmiusup Kalaallit Nunaanni tamarmi atuutsinneqalernissaa anguniarneqassasoq siorna Inatsisartuni akuersissutigivaat, aamma partiini annersanngortup Inuit Ataqatigiit qineqqusaarutaani allaqqavoq Naalagaaffiit Peqatigiit Meeqqat Pillugit isumaqatigiissutaata malinneqarnissaata anguniarnissaanut Meeqqat Illersuisuat qanimut suleqatigineqassasoq. Tamakku Meeqqat Illersuisuannut siunissamut neriuuteqalersitsivoq.

– Qinersinerup qaangiunnerani siullertut oqaatigerusutara tassaavoq neriulluarama, meeqqat, inuusuttut ilaqutariillu atugaat qineqqusaarnernermi assut initusimapput, Sermitsiamut oqarpoq.

Nuna tamakkerlugu periusissiaq

- Partiit tamarmik oqariartuutigigaluaraat immikkut maluginiarpara partiini annersanngortup Inuit Ataqatigiit tunngaviusumik qineqqusaarutimini immikkut allassimammagu Meeqqat Illersuisuat suleqatigalugu Naalagaaffiit Peqatigiit Meeqqat pillugit isumaqatigiissutaat anguniarneqassasoq. Taanna eqqarsaatigalugu assut neriulluarpunga, siornami maajimi Inatsisartuni partiit tamarmiullutik aamma akuersissutigaat Naalagaaffiit Peqatigiit Meeqqat pillugit isumaqatigiissutaat Kalaallit Nunaat tamakkerlugu atuutsinneqalernissaa piviusunngortinneqassasoq, pingaaruteqarporlu qinikkat qinigaaffimmi aallartittumi tamanna eqqumaffigissagaat, Meeqqat Illersuisuat Aviâja Egede Lynge oqarpoq.

Inatsisit piviusunngortinniarneranni qunnerup suli annertunerujussua politikerinit eqqumaffigineqarnissaa kaammattutigaa, tassungalu tunngatillugu suli suliassaqangaatsiarnera aamma eqqumaffigeqqullugu. Meeqqat tapersersorneqarnissaanut tunngasoq inatsit pitsaasorujussuugaluartoq taamaattoq kommuninit eqquutsinniarnera kommuninit assut ilungersuutigineqartartoq oqariartuutigaa.

Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq:

Powered by Labrador CMS