Meeqqat nakorsaat mianersoqqusisut
Meeqqat nakorsaat pingasut 2018-imi juulip qulingiluaaniit 2020-mi juulip arfineq-aappaata tungaanut Dronning Ingridip Napparsimmavissuani sulisimasut ernumassutitik pillugit oqartussanut arlalinnut allagaqarsimapput. Mannali tikillugu suli akissutisisimanatik.
Tusagassiorfimmit meeqqat angajoqqaallu eksemeqarnermik ajornartorsiuteqarnerminni peqqinnissaqarfimmit iluamik isumagineqanngitsutut misigisimagamik Danmarkimut ikiortissarsiorlutik aallartariaqarsimasut pillugit arlalinnik ilanngutassiaqartoqarsimavoq.
Sermitsiaq.AG-mit sapaatip-akunnerata siuliani oqaluttuarineqarpoq, peqqinnissaqarfimmi aqutsisut isumaqartu, angajoqqaat toqqissillutik meeqqatik nakorsiussinnaagaat, maani suleriaaserineqartartut tamarmik Danmarkimi periuserineqartartumut assigummata.
Kalaallilli Nunaanni meeqqanut nakorsaasimasut pingasut allarluinnarmik saqqummiussipput.
Meeqqanut tunngatillugit sulisunik ilinniarsimasunik amigaateqartoqarpoq, soorlu meeqqat nakorsaat meeqqanillu peqqissaasut. Meeqqat napparsimasut nakkutigineqarnissaannut katsorsarneqarnissaannullu atortunik amigaateqartoqarpoq. Nakorsat inuusunnerusut meeqqanik peqqinnissaqarfimmut eqqunneqartunik siulliullutik katsorsaasartut akornanni meeqqat nappaataannik tunngaviusumik ilinniagaqarsimasut amigaataapput.
Oqartussat akissuteqarsimanngitsut
Meeqqat nakorsaat pingasuusut Lene Hesse Rasmusseni, Ayesha Kadira aamma og Eva Mølleri peqqinnissaqarfimmi aqutsisunut, nunatsinni nakorsaanermut, meeqqat illersuisuannut, folketingimi ilaasortanut Danmarkimilu isumaginninnermut nunamullu namminermut ministerimut ernumassutitik pillugi allagaqarsimapput.
Allakkanut ulloq 13. oktober 2020 ulluliunneqarsimavoq, meeqqallu nakorsaat taakku pingasuullutik pitsanngorsaataasinnaasunik siunnersuuteqarsimapput, allagaqarsimaneranniillu ukiup aappaata affaa qaangiuttoq peqqinnissaqarfimmi aqutsisunit peqqissutsimullu naalakkersuisumit suli akissutisisimanngillat.
Meeqqat nakorsaasa pingasuutut taakku allakkaminni oqaluttuaraat, Dronning Ingridip Napparsimmavissuani meeqqanik peqqissaasumik atorfeqartitsisoqanngitsoq, meeqqallu napparsimanerpaat nakkutiginissaannut atortorissaaruteqartoqanngitsoq. Peqatigitillugu meeqqat nunami maanit eqqortunik atortoqarluni suliarineqarsinnaagaluartut, aningaasarpassuit atorlugit Danmarkimut suliaritikkiartortinneqartarlutik.
Sumiginnarneqartut
Meeqqat nappaataannut nakorsaanertulluunniit atorfik inuttassarsiuuteqqinneqarsimanngilaq, susassaqarfimmi marlunnik nakorsaqartussaagaluartoq, taakku allapput.
- Misigisimavugut meeqqaik sullissinerup pitsaassusissaanik salliutitsisoqanngitsoq, taamaalilluni kukkusumik katsorsaasoqarsinnaalluni - tassa kalaallit meerartaat sumiginnarneqarput, meeqqat nakorsaasa allagaanni, Sermitsiaq.AG-mt takuneqarsimasumi allassimavoq.
Meeqqat illersuisoqarfiata MIO-p meeqqat nakorsaat pingasut taakku ataatsimeeqatigisimavai, nakorsallu sinnerlugit Peqqissutsimut Naalakkersuisoq Kiista L. Fenckeri akissuteqaqquneqarsimalluni. Akissuteqaqqusilluni nukingisaarutit kingulliit Peqqissutsimut Naalakkersuisoqarfimmut ukioq manna februaarip 22-ani nassiunneqarsimapput. Tamanna Peqqissutsimut Naalakkersuisup Kiista L- Fenckerip uppernarsarpaa.
- MIO-mi pisussaaffigineqarpoq, meeqqat tapersersorneqarnissaannut inatsit amma FN-ip Meeeqqat pillugit isumaqatigiissutaa nunami maani malinneqarnersoq pillugu misissuinissamut. Paasissutissat pisariaqartinneqartut oqartussanit pissarsiarineqarsinnaannginnerat ajorluinnarpoq, Aviâja Egede Lynge akissutisisoqarsimannginnera pillugu Sermitsiaq.AG-mut oqarpoq.
Sermitsiaq.AG-mit ilisimaneqarpoq, angajoqqaat sisamat meeqqatik Danmarkimi nakorsanut misissortikkiartortillugit katsorsartikkiartortillugillu Danmarkiliartariaqarsimasut. Angajoqqaat pineqartut Danmarkiliarnertik Danmarkimilu najugaqarnertik namminneq akilersimavaat.
Pitsanngorsaataasinnaasunik oqaloqatigiittoqarsimanngitsoq
Meeqqat nakorsaasa allagaqarnerminni oqaluttuaraat, Dronning Ingridip Napparsimmavissuani meeqqat inersimasullu katsorsarneqarnissamut assigiinngitsupilussuarmik periarfissaqartinneqarnerat arlaleriarlutik oqaatigisarsimallukku. Nalunaaruteqartaraluarlutillu akissutisinngisaannarsimallutik aamma aqutsisunit isumaqatigineqaratik misigisarsimallutik, taakku allapput.
- DIN-imi meeqqat malunnaatilimmik aningaasartuuteqanngikkaluarluni iliuuseqarfigineqarlutillu katsorsarneqartarnerisa pitsaassusaannik qaffassaasussanik ajornanngitsumik allannguutaasinnaasunik siunnersuuteqartarsimavugut, tassa immikkut nunamut allamut suliaritikkiartortitsinermi aningaasarpassuit atorneqartartut sipaarutigineqarsinnaasuuppata.
Meeqqat nakorsaasa oqaatigaat, Kalaallit Nunaanni ataavartumik nappaatilippassuit ianersuunneqartariaqartuusut peqqinnissaqarfimmit immikkut ittumik isumagineqartariaqaraluartut.
Peqqissutsimut Naalakkersuisup Kiista L. Fenckerip Sermitsiaq.AG-mut ilisimatitsissutiginikuuaa, peqqinnissaqarfimmi innersuusseriaatsit piumasaqaatillu maanna misissuiffigineqartut.
Sermitsiaq.AG-mit Peqqinnissaqarfimmi aqutsisut Naalakkersuisullu tamatumunnga oqaaseqartinniarneqarput.