Meeqqat minnerit influenzamut akiuussutissamik neqeroorfigitissapput

Meeqqat marlunniik arfinilinnut ukiullit nualluummut influenzamut akiuussuserneqarnissamik neqeroorfigineqartussanngorput. Taama neqerooruteqarneq nutaarluinnaasoq nunatta nakorsaaneqarfia nittartakkamini ilisimatitsivoq.

Nualluummut akiuussutissaq meeqqanut sanaajuvoq akuerisaallunilu. Sorlukkut seqqittagaavoq, sorluit illuttut seqqinneqartarlutik.

- Peqqinnissamut oqartussaasut inassutigaat, meeqqat akiuussutissinneqarnissaannut neqeroorut akuerineqassasoq, taamaalillunilu meeqqat, ilaqutariit inuiaqatigiillu sinnerini tuniluuttoqarnissaa pinaveersaarneqassasoq, nunatta nakorsaaneqarfia allappoq.

Mattusimanissamut pinaveersaartitsissut

Nunatta nakorsaaneqarfia ilisimatitsivoq meeqqat ukioqatigiiaat pineqartut nualluummik tunillatsinnermini amerlanerpaartaat sakkukitsumik napparsimasartut. Ilaqarpulli anersaartuutimikkut perulullutik atuipilussinnaasunik.

- Pingaartumik meeqqat mikisut nualluummik napparsimangaatsialersinnaapput, taamaattumillu assersuutigalugu meeqqat qatanngutiminnut nukarlernut tunillaassuinissaasa pinaveersaartinnissaa naapertuutissaaq.

Meeqqat nualluummut akiuussusertinnerini suliartunngitsoornerit, meeqqanik angerlartitsinerit ullullu napparsimaffiusut pinaveersaartinneqarsinnaapput.

Nualluummik tunillatsissimanermi mattusimanissamut piumasaqaateqartoqanngikkaluartoq, taamaattoq nualluutip ersiutai coronavirusimut assigulluinnarput. Meeqqallu minnerit assigusumik ersiuteqalersillutik coronavirusimut aamma misissortittariaqartarput, angajoqqaallu ilagalugit angerlarsimaannarallartussaallutik.

Meeqqat tunillaanerusartut

Meeqqat marlunniik arfinillit tungaannut ukiullit akiuussusernerini inuiaqatigiinni nualluutip tuniluunnissaanut pinaveersaartitsisinnaavoq.

- Aamma meeqqat inersimasunut sanilliullutik akulikinnerusumik sivisunerusumillu virusimik katagaasarput, taamaalillutillu amerlanerusunut tunillaasarlutik, nakorsaaneqarfik allappoq.

Meeqqat nualluummik tunillatsinnerminni meeqqerivimmi attavigisatik ilaquttatillu tunillassinnaavaat, tuniluunnerlu taakku inuiaqatigiinnut siaruartissinnaallugu.

- Meeqqat marlunniit arfinilinnut ukiullit akornanni nualluummik pinaveersaartitsinitsinni nualluutip tuniluutingaatsiarsinnaanera annikillisissinnaavarput. Pingaartumik ukioq manna, aamma COVID-19-imik sorsugassaqarfigisatsinni peqqinnissaqarfiup artukkerneqarnissaa pinaveersaartussaagatsigu, aammalu inuiaqatigiinni sanngiinnerit napparsimarululersinnaasut illersortussaagatsigit tamanna pingaaruteqartorujussuuvoq.

Nunat arlallit, soorlu Finland, USA, England aamma Australia meeqqat nualluummut akiuussuserneqartarnissaat ukiuni arlalinni kaammattuutigisareerpaat. Danmarkip nunattalu maanna aamma kaammattuutigilerpaat.

Oqartussat ilisimatitsipput najukkami peqqinnissaqarfiit meeqqat qaqugu akiuussuserneqarsinnaalissanersut ilisimatitsissutigiumaaraat.