Arfininngornerup ullaassaani Nanortalimmi innuttaasoq angerlariartorami qaninnersiorluni ivigaasanik arsaattarfik ikaarniarlugu aalajangersimavoq. Taanna meeqqanik mikisunik isiginnaartartut issiaviata ataani sinittunik naammattoorsissalluni sillimasimanngilluinnarpoq:

- Soorunami silami issiaviup ataani sinittut naammattuukkakka pillugit tupaqaanga. Sukkaannaq ajunngitsumik anersaartornersut qanillillugit maluginiaqqaapallappara, oqiliallaatigeqisannillu paasivara "siniinnartut". Naalli massa ajoqusersimarpasinnginnerat oqiliallaatigigaluarlugu nalligingaarakkit qulliikka noqinneq sapilerpakka, meeqqanik silami sinittunik naammattoorsisoq oqaluttuarpoq.

Aaqqissuisoqarfimmit tusarfitta atia nalunngilarput, taassumalu kissaatigaa kinaassutsini ersersinneqassanngitsoq.

Taanna misigisani pillugit Sermitsiaq.AG-mut oqaluttuarpoq :

- Nalunngilara isumaginnnittoqarfiup nakkutilliisua (socialvagt) qanoq normoqarnersoq, piaarnerpaamik attavigivakka, taakkulu meeqqat aavaat. Naatsorsuutigisimavara socialvagtit politiinut ilisimatsissasut taamaammat uanga politiit attaviginngilakka, taamaallaalli socialvagti attavigivara

Politiinut nalunaarutiginnittoqanngilaq

Sermitsiaq.AG-mit nunatsinni politiit nakkutilliisuutitaanni nakkutilliisut pisortaat attavigaarput. Taannali oqaluttuarpoq meeqqanik silami sinittunik naammattoorsisoqarsimaneranik nalunaarutiginnittoqarsimanngitsoq, taamaammallu meeqqanik nassaartoqarneranik suliamut politiit akuusimanngitsut.

- Meeqqanik mikisunik nassaartoqarsimaneranik politiinut nalunaaruteqartoqarnikuunngilaq. Taamaattumik pisoqarsimappat politiit minnerpaamik ilisimasariaqaraluarpaat tassami meeqqat pillugit nalunaartussaatitaaneq kalluarneqaraangat akuusarnissarput pissusissamisoorpoq, kisiannili aamma imaassinnaavoq kommunimi isumaginnittoqarfiup aalajangiussimagaa pisup pereernerani aatsaat politiinut nalunaarutiginnittoqassasoq, taamak oqarpoq politiit nakkutilliisitaasa pisortaat Sermitsiaq.AG-mut.

Asseq siammarterneqaqattaartoq peerneqarpoq

Naalli meeqqat pineqartut pillugit nalunaarutiginnittoqarsimanngikkaluartoq, Kommune Kujallermi isumaginnittoqarfimmit politiinut attaviginnittoqarsimavoq asseq facebookikkut sukkaqisumik ingerlaartinneqartoq peerneqaqqullugu ikioqqusimagamik.

Tamatuma malitsigisaanik politiit meeqqanik naammattoorsisimasoq assimillu facebookimut ikkussisimasoq attavigigisimavaat qinnuigalugulu asseq peeqqullugu, tamannalu tusarfitta naalassimallugu oqaluttuarpoq.

- Politiit takkupput qinnuigalungalu asseq facebookimut ikkussimasara peeqqullugu, taamaaliorpungalu. Naluara eqqortuliorsimanerlunga assimik ikkussigama, kisiannili misigisimagama meerartatta ilanngui qanoq pineqartarnersut toqqorterneqartariaqanngitsoq. Misigigama inersimasut meeqqanik paarsilluanngikkaangata meeqqat qanoq erloqitinneqartarnersut nassuerutigisinnaasariaqaripput takusinnaasariaqarippullu. Assiligakkit isumageqqissaarpara kiinannguisa ilisarnannginnissaat, kisianni facebookimut ikkussininnut pissutaavoq kissaatigeqigakku ammasumik meerartatsinnut qanoq atugassaqartitsisoqarnersoq oqaluuserisinnaasariaqaripput, angut meeqqanik silami sinittunik nassaartoq oqaluttuarpoq 

Kommune Kujallermi isumaginnittoqarfimmi pisortaq, Nielsine Petersen ilumoorneraavoq meeqqanik silami sinittunik Nanortalimmi naammattoorsisoqarsimaneranik isumaginninnermut nakkutilliisoq nalunaaruteqarsimasoq, taamaattorli suliaq tamakkerlugu ilisimalertinnagu qanorpiaq pisoqarsimanersoq pillugu oqaaseqarumanngikkallarpoq.