Meeqqat marluk coronamik kingunerlutitsillutik Sanami uninngasut

Nunatsinni nakorsaanerup meeqqat marluk coronap kingunerluutaanik MIS-C-qartut sapaatip-akunnerata siuliani paasisimavai, kingunerluut taanna meeqqat qaqutigoortupillussuarmik atortarpaat. Meeqqat marluk taakku Nuummiittumi Sanap peruluttunut immikkoortortaqarfiani uninngapput.

Meeqqat marluk arfineq-marlunnik qulingiluanillu ukiullit Nuummi Dronning Ingridip Napparsimmavissuata peruluttunut immikkoortortaqarfiani uninngapput.

Nunatsinni nakorsaanerup Henrik L. Hansenip marlunngornermi tusagassiortunik katersortitsinermi ilisimatitsissutigaa, nunami maani MIS-C-eqartunik marlunnik paasisaqarsimaneq takorlooruminaattoq, nappaammi pineqartoq qaqutigoortupilussuummat.

Nakorsaanerulli erseqqissaassutigaa, nappaat ilisimaneqareersoq.

- Meeqqat covid-19-eqareerlutik timip atortuisigut tassanngaannartumik nappaateqalersinnaapput. Tamanna qaqutigoortupilussuuvoq. Kalaallit Nunaanni ataatsikkut marluk taamatut napparsimaleriasaarsinnaanerat naatsorsuutigisinnaasimanngilarput. Nalaatsortumilli taamatut pisoqarsinnaanera naatsorsuutigineqartariaqartarpoq.

Taamatut nalaataqartartut pillugit erseqqissunik kisitsisaateqartoqanngitsoq

Ugeskriftet.dk –p ilanngutassiaani atuarneqarsinnaavoq, MIS-C (multisystem inflammatory syndrome in children) meeqqat coronaqarsimasut kingunerluutigisartagaat qaqutigoortupilussuusoq, tamatumali qanoq akulikitsiginera pillugu erseqqissunik kisitsisaatigineqanngitsoq.

- Eqqoriaarujussuarluni missingiissagaanni, meeqqat tunillatsissimasut 20.000-it akornanni ataaseq MIS-C-qalersinnaavoq, Ulrikka Nygaard Rigshospitalets Børne og Unge Klinik-imeersoq, meeqqat Covid-19-eqartut pillugit nunami ilisimatusarnermik suleqatigiinnik aqutsisoq oqarpoq.

CRP

C-reaktivt protein (CRP) tassaavoq, aseruuttoornermut/timip ipiutaasartaatigut ajoqusernermut atatillugu tingummi katersuuttartoq.

Pissarsiffik: Sundhed.dk

Nappaat ilaatigut kissarneqarujussuaqartitsilersarpoq, annertuumik CRP-eqartitsilersarluni aamma timip atortuinut minnerpaamiki marlunnut sunniuteqartartoq, tassunga ilanngullugit naakkut-inalukkatigut, uummatikkut aamma/imaluunniit amikkut ameraasatigullu nappaateqalersitsisinnaalluni.

Meeqqat inuusuttuaqqallu coronavirusimik sakkukitsumik ersiuteqanngitsumilluunniit tunillatsissimanermik kingorna sapaatip-akunnerisa ataatsip arfinillillu akornanni piffissap ingerlareersoq tassannga nappaateqalersinnaapput.

Nappaatip kinguneranik kissarneqartoqalersarpoq aamma annertuumik CRP-eqalertoqalertarpoq kiisalu qipinngutigut aseruuttoornermut paarlaanneqarsinnaasumik naakkut anniartitserujussuartarluni.

Nappaatip malunnaatai nakorsarneqartartut, nunatsinni nakorsaaneq ilisimatitsivoq.

Powered by Labrador CMS