Overgreb
Meeqqat killisiorneqarnerini avatangiisit toqqissisimanerusut
Politiit meeqqat illuinik immikkut ittunik, meeqqanik videokkut killisiuilluni atorneqarsinnaasunik kissaateqarput.
Meeraq kinguaassiutitigut atornerlunneqarsimanini pillugu oqaluttuassaguni, toqqissisimasumiinnissaa pisariaqarpoq.
Tamanna Kalaallit Nunaanni Politiit immikkut maluginiarluarpaat. Taamaammat politiit meeqqat illuinik immikkut ittunik, meeqqanik killisiuiffiusinnaasunik kissaateqarput. Tamanna §37 naapertorlugu Deborah Kleistip (IA) apeqqutaanut akissummi atuarneqarsinnaavoq.
- Danskit politeeqarfiini meeqqat illuini killisiuiffiusussatut aaqqissuussani video atorlugu killisiuineq pisarpoq, politiit akissuteqaammi allapput.
Aamma atuaruk: Meeraq ulluni 165-ni videokkut apersorneqarnissaminut utaqqisariaqarsimasoq
- Taamaattumik Kalaallit Nunaanni illoqarfinni arlaqartuni meeqqanut illuliortoqarnissaa Kalaallit Nunaanni politi it kissaatigaat, taakku meeqqat kinguaassiutimikkut atornerlunneqarsimasut il.il. video atorlugu killisiorneqarnissaannut atorneqarsinnaassallutik. Tamanna pillugu politiinit kissaatigineqarpoq minnerpaamik kommunini illoqarfiit pingaarnerit meeqqat illoqartariaqartut, imaappoq Qaqortumi, Sisimiuni lIulissanilu meeqqat illoqartariaqarput. Nuummi meeqqat ilussussaanik pilersitsinissaq maannakkorpiaq sulissutigineqarpoq.
Aamma atuaruk: Videokkut killisiuisarnermut utaqqisarneq sivikillineqassaaq
Nunaqarfinni allaffiit akunnittarfiillu
Qaqortumi, Tasiilami, Sisimiuni, Aasianni, Uummannami aamma Nuummi videokkut killisuinermut atortunik peqarpoq. Kisianni ingammik illoqarfiit avataanni politiit sapinngisartik atorlugu killisiuinernut taamaattunut tulluarnersiorlutik nassaarniartarput.
- Video atorlugu killisiuinermi atugassanik avatangiisinik sapinngisamik tulluarnerpaanik nassaartoqarnissaa Kalaallit Nunaanni Politiini video atorlugu killisiuisartut eqqumaffigisorujussuuaat, kommunillu aallartitaat najukkanilu politeeqarfiit oqaloqatigineqarnerat aallaavigalugu ininik toqqaasoqartarpoq, akissummi tamanna allaqqavoq.
- Video atorlugu killisiuinerit ilaatigut inini kommunip atukkiussaani ingerlanneqartarput, nunaqarfinnilu video atorlugu killisiuinerit atuarfinni inini imaluunniit allaffittut sanaartukkani ingerlanneqartarlutik. Allani inissiat atorneqanngitsut killisiuiffiusarput ilaannikkullu hotelini init video atorlugu killisiuinerm i atorneqartarlutik.
Videokkut killisiuisarnernut tunngatillugu nuna isorartooq unammillernartarpoq.
- Suliat ilaanni video atorlugu killisiuisartoq meeqqap illoqarfigisaanukarluni imaluunniit nunaqarfigisaanukarluni video atorlugu killisiuiartortarpoq, sulianili allani meeraq angajoqqaatut sinniisumik ilaqartillugu illoqarfimmut anginerusumut killisiuinerm i peqataajartortillugu aallartinneqartarpoq, akissummi tamanna allaqqavoq.