Meeqqat kalaallisuut pillugit ilinniagaqartut

Paamiut atuarfianni atuartut workshoppertitsinermi kalaallisuuliaat illoqarfiup katersugaasiviani saqqummersinneqassapput.

kilde: Paamiut Museum kilde: Paamiut Museum Kilde Paamiut Museum kilde: Paamiut Museum kilde: Paamiut Museum kilde: Paamiut Museum Kilde Paamiut Museum kilde: Paamiut Museum

Kalaallisuut (Avittat) suminngaanneersuuppat, aamma nunami sumiiffinni assigiinngitsuni kalaallisuut qanoq isikkoqarpat. Paamiuni Atuarfik Tuiisami atuartut sapaatip akunnerini makkunani workshoppertitsinermit tamakkua ilinniassavaat.

Workshoppertitsinermut taaguusiunneqarsimavoq ”Kalaallisuut meeqqat isaanniit”, meqqallu qanoq ukioqarnerannut naleqqussarneqarsimalluni. Workshoppertitsineq eqqumiitsuliortumit Susanna Jensenimi, meeqqanik workshoppertitsinermik misilittagalimmit ingerlanneqassaaq.

Meeqqat qanoq isumaqarpat

Paamiut Katersugaasiviani pisortap Vinnie Birkedalip oqaluttuaraa, suliniuteqarnermi pineqartoq kalaallisuut pillugit kulturimut atatillugu oqallinnermut meeqqat peqataatinneqarnissaat.

- Kikkut tamarmik kalaallisuunik nuannarisaqarput. Eqqumiitsuliortut arlallit assigiinngitsutigut nutaaliaanerusunik atuillutik misiliisimapput. Ilaasa nutaaliaanerusut nuannarivippaat, ilaasali isikkumisut isikkoqartuaannarnissaat perusunnerullugu, katersugaasivimmi pisortaq Sermitsiaq.AG-mut oqarpoq.

- Soqutiginassagaluarpoq meqqat tamatumunnga tunngatillugu qanoq isumaqarnersut paasissallugu. Taakkuuppummi siunissamit kalaallisuunik atuisussat, taanna itisiliivoq.

Matematik atorlugu kalaallisuuliorneq

Workshoppertitsinermi meeqqat ilinniassavaat avittat suunersut, sapakkat suminngaanneernersut Kalaallillu Nunaanni kalaallisuut isikkuisa assigiinngissusaat.

Meeqqat nammineq misilissavaat avittaliorneq, nuilarmiuliorneq, sapakkat anginerit atorlugit nuilarmiuliorneq allarpassuillu, peqatigitillugu kalaallisuut oqaluttuarisaanerannik paasisaqarnerussallutik.

- Aamma sapakkat qanoq amerlatigisut atornissaannut il. il. matematik atorlugu naatsorsuisassapput. Tassa kalaallisuulionerminni arlalippassuarnik ilikkagaqassapput, Vinnie Birkedal oqarpoq.

Allatut ilinniartitsineq

Meeqqat suliaat Paamiut Katersugaasivianni saqqummiunneqassapput. Suliniut ”kulturimut isumasiorfik” workshoppertitsinermik ingerlatsisuuvoq. Kommunip kultureqarnermut immikkoortortaqarfia tassaavoq ilinniartitsinermi kulturtimik nutaaliorsinnaanermillu ilanngussilluni misiliisoq.

- Meeqqat ilaat nalinginnaasumik suliaqartarnermut sanilliullugu allatut suliaqarsinnaanermik ilinniassapput. Taamaammat kommunip klassini kulturimut tunngassuteqarnerusunik ilinniartitsisoqartarnissaa allatullu ilinniartitsisoqartarnissaa anguniarlugu eqqumiitsuliortut suleqatigai.

-Neriuutigaara ilinniartitsisut kulturimut isumasiorfik ullumikkornit atornerusassagaat, taanna oqarpoq.

Kommunip suliniut Nuummi aallartinneqarsimasoq, Tasiilami ingerlateqqinneqarnissaa sulissutiginiarpaa, tamannali aatsaat upernaamut pissassoq ilimanarpoq, Vinnie Birkedal ilisimatitsivoq.

Powered by Labrador CMS