Meeqqat kaattut anaanaminnik aqqusinermi ujaasisimasut
Niviarsiaqqat marluk inersimasoq nalusartik attavigisimavaat, inersimasullu politiit aggersarsimavai.
Niviarsiaqqat nukangasut marluk sapaatip-akunnerata siuliani arfininngornerup ullaavani Nuup qeqqani aqqusinermut anillassimapput, kaannertik pissutigalugu anaanaminnik ujaasiniarlutik anillassimapput.
Politiit pigaartoqarfianit Søren Bendtsen Sermitsiaq.AG-mut taamatut oqaluttuarpoq.
Niviarsiaqqat aqqusinermiinnerminni inersimasoq saneqquttoq attavigisimavaat, taassumalu politiit saaffigisimallugit.
- Kaannertik pissutigalugu inersimasoq attavigisimavaat. Meeqqat anaanartik angerlarsimaffimmiit anisimasoq - ulloq sioqqulluguugunartoq anisimasoq ujaarisimavaat.
- Meeqqanut misigisaq sakkortooq
- Niviarsiaqqat sisamanik ukiullit pineqarput. Isumaginninnermi pigaartoq attavigisimavarput, taassuma meeqqat isumagineqarnissaat qulakkiisavaa, Søren Bendtsen oqarpoq.
Søren Bendtsenip erseqqissaassutigaa, meeqqat aqqusinermi kisimiillutik ujaasinerminni navianartorsiorluinnarsimasinnaasut:
- Uagut sulisarnitsinni pisoq annikikannersuuvoq, meeqqanulli taamatut inissisimanermik misigisaq sakkortuujulluni, Bendt Sørensen meeqqat isumaginninnermi oqartussanut isumagisassanngortinneqarsimammata, meeqqat qanoq pineqarsimanerannik ilisimatitsisinnaannginnerartoq oqarpoq.