Meeqqat Isummersorfii aalajangersakkanik tunniussipput
Meeqqat Avannaamioqatigiit Oqalliseqatigiiffianni, meeqqanik avannaamioqatigiinnit tamanit peqataaffigineqartumik aalajangersakkat NAKUUSAp Meeqqanut Siunnersuisoqatigiivisa ullumi tunniuppaat
Meeqqat Isummersorfii NAKUUSA’p ataaniittut Meeqqat Avannaamioqatigiit Oqalliffianni aalajangersakkanik Naalakkersuisunut tunniussipput.
Meeqqat Avannaamioqatigiit Oqalliseqatigiiffiata aalajangiussaat pingaaruteqartunut pingasunut avinneqarput; meeqqat pisinnaatitaaffiinik ilisimasaqarnerulernissaq pisariaqartinnerarpaat, meeqqat inuusuttullu peqataatitaanerulernissaat, aammalu akuliutsitaallutik katingateqatigiinnut peqataatitaanerulernissartik kissaatigaat.
Pisinnaatitaaffinnik ilisimasaqarnerunissaq
2019-imi novembarimi NAKUUSAp Meeqqanik Ataatsimeersuartitsinerani anguniakkatut aalajangiussat piviusunngortinneqarnissaannut ilungersuuteqarnermikkut, NAKUUSAp Meeqqanut Isummersorfii piareersarluarsimanertik pissutigalugu aalajangiussanut annertuumik sunniuteqarput.
Vivi Mølgaard Kleist Kommune Kujallermi Meeqqanut Isummersorfimmeersoq ima oqarpoq:
- Inersimasut uagutsinnut tunngasunik aalajangiitigatik apereqqaartuassagaatigut aalajangiussami innersuussutigaarput. Aalajangiunneqartut piviusunngortinneqarnissaat anguniarlutigu Kalaallit Nunaanni ilinniartitsisut meeqqat pisinnaatitaaffiinik ilisimasaqarnerulernissaat ilungersuutigerusupparput.
Naalakkersuisumik oqaloqateqarnissaq
Monica Mathiesen Avannaata Kommuneani Meeqqanut Isummersorfianneersoq oqarpoq:
FN-Byen-imi naapisimaarnitsinni kisitsisit takugatsigit takusinnaasimavarput meeqqat pisinnaatitaaffimminnik ilisimasaqartut ikippallaarujussuartut. Tamannalu iliuuseqarfigerusupparput. Taamaattumik Ilinniartitaanermut Naalakkersuisoq ataatsimeeqatigerusussimavarput, aalajangiussamut tunngasunik oqaluttuukkusukkatsigu.
Meeqqat Illersuisuat alaatsinaattutut aamma Meeqqat Avannaamioqatigiit Oqalliseqatigiiffiannut peqataavoq, kalaallillu peqataatitaasut iliusissatut pilersaarutaat malillugu Meeqqanut Siunnersuisoqatigiit Meeqqallu Illersuisuat isumaqatigiissutigaat peqatigiillutik Naalakkersuisunik ataatsimeeqateqarniarlutik.