Meeqqat inuusuttullu Tasiilami eqqumiitsuliortut

Sacha "Cheeky" Malinsky Tasiilameeqqammerpoq meeqqanut inuusuttunullu street art (silami eqqumiitsuliornermut, aaqq.) tunngatillugu workshoppertitseqqammerluni. Eqqumiitsuliat arlallit taamaasilluni pilersinneqarput.

Foto: Kommuneqarfik Sermersooq Foto: Kommuneqarfik Sermersooq Foto: Kommuneqarfik Sermersooq Foto: Kommuneqarfik Sermersooq Foto: Kommuneqarfik Sermersooq Foto: Kommuneqarfik Sermersooq Foto: Kommuneqarfik Sermersooq Foto: Kommuneqarfik Sermersooq

Tasiilami qarmat ilaat street artiliorluni suliaqarfissatut aaqqissuunneqarsimavoq. Septemberip aallartinnerani taamaaliortoqarpoq, meeqqat inuusuttullu sammisaqartinneqarlutik.

Eqqumiitsuliornermi oqaluttuatoqqat isumassarsiorfigineqarput. Eqqumiitsuliaq suliarineqartoq Iserit A/S-imit tunniunneqarsimasumut iikkamut qalipanneqarpoq. Iigaq qalipaaffik meeqqat atuarfiannit takuneqarsinnaavoq.

Aaqqissuussami meeqqat inuusuttullu ataatsimoornermik misiginissaat illoqarfimmillu piginneqataasutut misiginissaat siunertaavoq. Oqaluttuatoqqat Gaaba Taunaajimmit oqaluttuareqqinneqartuni Qilaat qitiulluinnarpoq.

- Siullermik Qilaat tassaagami siulitta aliikkusersoqatigiinnermikkut, imminnut paasarnermikkut isummakkullu sorsuuttarnermikkut pinngitsoorsinnaanngisaat, qilaat siulitsinnit pingaarutilipilorujussuuvoq, Gaaba Taunaajik oqarpoq.

Oqariartuut qiimmaallannartoq

Qilaat pillugu oqaluttuarnerup saniatigut Gaaba Taunaajik qupaloraarsuk pillugu aamma oqaluttuarpoq.

- Qupaloraarsuk upernaakkut ilisarnaatit nuannaarutaanerpaasarput siornatigut. Tassa taamani tikikkaangat nuannaartarpugut upernalernera eqqarsaatigalugu, oqarpoq.

Eqqumiitsuliortoq Sacha ”Cheeky” Malinsky Tasiilamut tikikkami maluginiarsimavaa iigaq atuarfiup tungaanut sammisuusoq. Taamaammat eqqarsarsimavoq oqariartuutigineqartussaq qiimmaallannartuussasoq. Oqaaseq Nalerarpuli allaqqasoq aalajangerneqarpoq.

Nutaaliorneq nukittussuserlu

Eqqumiitsuliaq Gâba Taunajip naapinnerani pinngoriartulersimavoq.

- Gaaba Taunaajiup naapinneratigut meeraasimanerminik oqaluttuarfigaanga, Angakkorlu kingulleq Georg Quppersimaat aamma oqaluttuaralugu, Sascha "Cheeky" Malinsky oqarpoq nangillunilu:

- Qupaloraarsuk Qilaallu oqaluasaanit soqutiginartunik imaqarput, isumassarsissutigineratigullu eqqarsarpunga Qupaloraarsuup ersersissagaa, eqqissineq inuunerlu, Qilaatillu ersersissagaa isumassarsiorneq sorlaqarfikkullu nukittuujuneq.

Meeqqat inuusuttullu arlallit eqqumiitsuliornermi peqataasimapput, neriuutigineqarporlu illoqarfimmi innuttaasunut oqariartuut qiimmaallaataasassasoq.

Powered by Labrador CMS