Meeqqat inuusuttullu siunnersuisarfiannut 140.000 koruuninik tunissuteqartoq

Nunafondenip 140.000 koruuninik tapiissuteqarneratigut qulakkeerneqarpoq meeqqanik suliniaqatigiiffiup MIO-p SMS-ikkut siunnersuisarfiata 1899-ip 2016-ip sinnerani ingerlaqqiinnarnissaa.

Nuna tamakkerlugu neqeroorut

SMS-ikkut siunnersuisarfik nuna tamakkerlugu meeqqanut inuusuttunullu, inersimasunik oqaloqateqarnissaminnik imaluunniit ikiorneqarnissamut siunnersorneqarnissaminnut pisariaqartitsisunut, neqeroorutaavoq.

2013-imi aallartippoq

SMS-ikkut saaffiginnittarfik 2013-imi suliniutitut aallartinneqarpoq, paasineqarporlu taanna pisariaqartinneqartorujussuusoq. Siunnersuisarfik siorna meeqqanit inuusuttunillu 1.000-t sinnilinnit saaffigineqarsimavoq, tamakkualu saaffiginnissutigisarsimavaat qinngasaarneqartarneq, kiserliorneq, angerlarsimaffimmi ajornartorsiutit, naapertuilluanngitsuliorfigineqarneq, nakuuserfigineqarneq imminullu toqunnissamik isumaliuteqartarnerit, MIO taamatut paasissutissiivoq.

Meeqqat illersuisuata Aviâja Egede Lyngep erseqqissarpaa SMS-ikkut siunnersuisarfiup ingerlannissaanut MIO nammineq aningaasaateqanngitsoq, taamaattumillu avataanit aningaasaliiffigineqartarneq isumalluutigalugu.

Inersimasunik atorfissaqartitsisut

– Tunissutit qujamasuutigisorujussuvakka, siunnersuisarfiup ingerlaannarnissaanik qulakkeerinneqataammata. Meeqqat inuusuttullu inersimasunik, ajornartorsiutiminnik paasinnissinnaallutillu takunnissinnaasunik, atorfissaqartitsipput. Nunatsinni meeqqat arlallit inersimasunik taamatut attaveqanngillat, taamaattoqartillugulu siunnersuisarfik pingaaruteqartorujussuusoq paasineqarpoq, meeqqat illersuisuat tusagassiorfinnut nalunaarutikkut erseqqissaavoq.

Siunnersuisartut arfineq-marluk

Siunnersuisarfimmi siunnersortit arfineq-marluupput, ilinniartitsisutut, socialrådgiveritullu tunuliaqutallit, imaluunniit taamatut ilinniakkaminnik naammassinnilersut.

Aaqqissuussap aallartinnerani mislittakkat takutippaat siunnersuisarfik siunnersuisunit kajumissutsiminnik sulisunik tunngaveqarsinnaanngitsoq. Taamaattumik siunnersuisartut akissarsiaqartinneqarput.