Meeqqat inuusuttullu qimarnguissaanik pilersaaruteqartoqanngilaq
Meeqqat sumiginnarneqartut qimarnguissaannut aningaasanut inatsimmi misileraalluni aningaasaliisoqarnissaanut Naalakkersuisut peqquneqarnissaannut inatsisartuni aalajangiiffigisassatut siunnersuut, Naalakkersuisunit taperserneqanngilaq.
Nunatsinni kommunini meeqqat sumiginnarneqartut qimarnguissaannik pilersitsisoqarnissaanut maanna pilersaaruteqartoqanngilaq. Angajoqqaat aalakoorpata, angerlarsimaffimmiluunniit eqqissiviilliortitsisoqarpat, meeqqat sumiiffigisinnaasaannik kommunit pilersitsinissaannut, Naalakkersuisut aningaasaleeqataanissamut pilersaaruteqanngillat.
Naalakkersuisut kommuninut misiliummik aningaasaleeqataanissaannut peqquneqarnissaannut, Peter Olsenip (IA) siunnersuutaa, Naalakkersuisunit taperserneqanngilaq. Aningaasat, 6 milliuunit koruuninik annertussuseqartussat, meeqqat angajoqqaatik aalakoornerisa nalaanni sumukarfissaaruttut qimarnguissaannut atorneqartussatut siunnersuutigineqarpoq.
- Sumiginnaaneq annerpaaq pisarpoq inooqatigiinni ajutuuinnermi ikiuutaasinnaasut matoqqanerisa nalaanni, Peter Olsen siunnersuummut tunngavilersuutimini allappoq.
Kommunit susassaqartuupput
Isumaginninnermut Naalakkersuisoq, Martha Abelsen (S) Inatsisartut ataatsimiinnissaat sioqqullugu akissuteqaammini erseqqissarpaa meeqqanut sunngiffimmi susassaqartitsinerit meeqqanullu qimarnguiusinnaasut allat kommunit akisussaaffigigaat, taamaammat kommunit oqaloqatigeqqaarsimatinnagit Naalakkersuisut IA-meersup siunnersuutaanut tapersiisinnaanngitsut.
Taassuma saniatigut meeqqat angerlarsimaffiup avataanut inissinneqartartut ikilisinnissaanut tamanna iluaqutaassanersoq, Naalakkersuisut qularaat.
- Siunnersuut kissaatitta angunissaanut eqqortuunersoq Naalakkersuisut nalornissutigaat. Meeqqat qimaaffissaqartissavavut, siunissamulli ungasinnerusumut pitsaanerusunik atugassaqartilissavavut , peqqissutsimut, isumaginninnermut inatsisinillu atuutsitsinermut Naalakkersuisoq, Martha Abelsen aperaaq.
Martha Abelsen (S) akissuteqaammini allappoq meeqqat angerlarsimaffiup avataanut inissinneqartartut ikilisinniarlugit Naalakkersuisut aaqqiissutissanik suliaqartut. Taassuma erseqqissarpaa ungasinnerusoq eqqarsaatigalugu aaqqiissutissamik pisariaqartitsisoqartoq, ilaqutariit tamarmiusut qitiutinneqassallutik.
- Ajornartorsiutip aallaavia tunngavigisariaqarparput ilaqutariillu meerarlu pillugit siunissamut ungasissumut isigaluta aaqqiissummik suliaqassaagut. Kisianni siunissamut ungasissumut tamarmiusumillu aaqqiissuteqarniarnerit uagut suliarisariaqarpavut namminneq aaqqikkunnanngimmata. Taamaaliornissamut sullissisut eqqortunik piginnaasallit pisariaqartitatta ilagaat , allappoq.
Siunnersuut Inatsisartuni apriilip qulingani siullermeerneqassaaq.