Meeqqat inuusuttullu aamma pissartanngorniutissanngillat

Nukappiaqqat U15-it isikkamik arsaalluni Maniitsumi pissartanngorniunneri, unammiartut aaqqissuisullu isumaqatigiillutik taamaatiinnarpaat. KAK, Kalaallit Arsaattartut Kattuffiat, Facebookimini taama ilisimatitsivoq.

Nukappiaqqat U15-it aamma isikkamik arsaallutik pissartanngorniutissanngillat.

KAK – Kalaallit Arsaattartut Kattuffiat Facebookimini marlunngornermi unnukkut ilisimatitsivoq unammiartut aaqqissuisullu isumaqatigiillutik Maniitsumi pissartanngorniunnerit taamaatiinnarpaat.

Naalakkersuisut ippassaq aalajangerput inuit 20-t silami illup iluaniluunniit katersuussinnaasut 20-nut killilerpaat.

Ingerlatiinnarnissaa misissorneqaraluartoq

Nukappiaqqat pissartanngorniunnerisa ingerlatiinnarnissaat KAK-p misissuiffigisimagaluarpaat. Arsaalluni pissartanngorniunnerit marlunngornermi nalunaaqutaq 14.00 aallartikkaluarput. Nuummiit B-67, Maniitsumiit Agqissiaq, Ilulissaniit N-48 aamma Sisimiuniit SAK peqataapput.

Peqataasunit arfineq-pingasut unammeqataasassasut aalajangerneqareernikuuvoq. Pissartanngorniunnerulli ingerlatiinnarnissaanut misissorneqaraluarpoq holdi ataaseq arfineq-marlunnik isersimasoqartarsinnaanersoq. Pissartanngorniunnerit tallimanngorneq julip 16-ata tungaanut ingerlanneqartussaagaluarput.

Ammaanersiornerulli kinguninngua pissartanngorniunnerit taamaatiinnarneqarput.

Taamaatitsigallarnissamik innersuussineq

Timersoqatigiit Kattuffiat, GIF-ip generalsekretæria Jonas Jensen tusagassiorfinnut nalunaarutimini pissartanngorniunnerit, anngunniunnerit nunatsinnilu aaqqissuussat assingusut tamaasa taamaatikkallarnissaat innersuussutigaa.

- Ilisimatitsissutingissuarput maleruaqqusat killilersuinerillu allanngorsinnaanerat kiisalu
sivitsorneqarsinnaanerat sillimaffigineqassasoq, Jonas Jensen ilisimatitsivoq.

Paamiuni utoqqaat ataatsimoornissaata ingerlatiinnarnissaa suli aalajangiiffigineqanngitsoq, utoqqaat peqatigiiffiisa ilaat ilisimatitsivoq. Ataatsimooqatigiinnissaq tallimanngorpat aallartittussaagaluarpoq, aqaguli siulersuisut aalajangiissapput pilersaarutit ingerlatiinnarneqassanersut pillugit.

Powered by Labrador CMS