Meeqqat inuusuttuaqqallu psykiatriimut attaveqarput
Nunatsinni meeqqat sumiginnakkat amerliartornerat malillugu meeqqat inuusuttullu tarnimikkut nappaatillit sullinneqarnerat malunnaatilimmik annertusiartorpoq. Inatsisartuni akissuteqarluni Anna Wangenheim oqarpoq.
Meeqqat inuusuttuaqqallu amerligaluttuinnartut tarnimikkut nappaatilinnut immikkoortortaqarfimmut attaveqartarput. Tarnimikkut napparsimasut atugaat pillugit iliuusissat pitsanngorsarneqarnissaat siunertaralugu nuna tamakkerlugu iliuusissamik pilersaarummik Naalakkersuisut ukiakkut 2021-mi saqqummiussaqarnissaannik, Mikivsuk Thomassen aalajangiiffigisassatut siunnersuuteqarnerani, Peqqissutsimut Naalakkersuisoq, Anna Wangenheim taama akissuteqarluni oqarpoq.
- Nunatsinni meeqqat sumiginnakkat amerliartornerat tunngavigalugu meeqqat inuusuttullu tarnimikkut nappaatillit sullinneqarnerat malunnaatilimmik annertusiartorpoq soorlu aamma kommunini isumaginninnikkut suliassaqarfit tamanna malugigaat, oqarpoq.
Kalaallit Nunaanni tarnimikkut nappaatilinnut immikkoortortami nakorsarneqartut december 2019-imi 1.400-t missaanniipput. Taakkunani meeqqat inuusuttuaqqallu 145-llutik.
- Suliniutit tarnimikkut nappaatilinnut tunngasut suli nukingernarnerulernissaat naatsorsuutigineqarpoq, Anna Wangenheim oqarpoq nangillunilu:
- Meeqqat inuusuttuaqqallu tarnimikkut nappaatillit taamatulluunniit pasineqartut pillugit ataqatigiinnerusumik aalajangiinissamut tunngavissamik suliaqartoqarpoq.
Iliuusissamik pilersaarut 2021-miunngitsoq
Inuit tarnimikkut nappaateqartut immikkoortortaqarfiani nakorsarneqarnerat pillugu aammalu malitseqartitsisarneq pillugu nuna tamakkerlugu iliuusissamik pilersaaruteqarnissaq Mikivsuk Thomassenip pisariaqartut nalilerpaa. Nakorsarneqartoq meeraappat inersimasuuppalluunniit apeqqutaatinnagu.
Pisariaqartitsineq Inatsisartuni tamanit isumaqatigineqarpoq, soorlu aamma Peqqissutsimut Naalakkersuisoq pitsanngorsaanissamut isumaqataasoq.
Naalakkersuisulli nalilerpaat ukioq ataaseq qaangiuppat siunnersuummik saqqummiussaqarnissaq piviusorsiunngitsoq.
- Maannakkut COVID-19-imik ajornartorsiuteqarneq aamma tamatuma sulisoqarnikkut aningaasatigullu isumalluutinik atuisariaqarfigineqarnerata malitsigisaanik piffissaliussatut siunnersuutigineqartumi iliuusissatut pilersaarusiortoqarsinnaasorinnittoqanngilaq, allassimavoq.
Anna Wangenheimip siunnersuutigaa Naalakkersuisut siunnersuummik suliaqassasut 2022-mi saqqummiunneqartussamik.
Immikkoortoq novemberip 18-ani aappassaaneerneqassaaq.