Meeqqat innarluutillit atugarisaasa pitsanngorsarnerat
Ajornartorsiutip annertussusaa misissuiffigeriarlugu iliuuseqartoqarnissaa, Debora Kleist-ip kissaatigaa
Atuartut timikkut imaluunniit tarnikkut innarluutillit meeqqat atuarfianni nalinginnaasumi atuartinneqartarput, ilaat tapersiiffigineqarsinnaallutik ilaalli tapersiiffigineqaratik. Atuartullu ilaasa innarluutitik akornutigitigisangaaramikkit, atuarfinni nalinginnaasumik periarfissarititat saniatigut, immikkut neqeroorfigineqarnissaq pisariaqartittarlugu.
Inuit Ataqatigiit sinnerlugit Inatsisartuni ilaasortap Debora Kleist-ip meeqqat inuusuttullu innarluutillit ilinniartinneqarneranni atugassarititaasut pitsanngorsaaffigerusuppai, assigiinngitsunilli innarluutillit pisariaqartitaat naapertorlugit ikiorsiiffiginiarlugit, siullermik ajornartorsiutip annertussusaa nalunaarusiarineqartariaqarpoq. Debora Kleist-ip sisamanngornermi ualikkut Inatsisartuni siunnersuutigaa, atuarfinni nalinginnaasumik neqeroorutigineqartartut saniatigut, immikkut pisariaqartitsisut ilinniartitaanerannut atatillugu atugassarititaasut naalakkersuisunit misissorluarneqarnissaat.
– Atuartut annertunerusumik perorsaanerup tungaatigut pisariaqartitsisut ullumikkut saaffigisinnaasaat amerlanngillat, Aasianni Ado Lyngep Atuarfia eqqaassanngikkaanni, Debora Kleist oqarpoq, meeqqalli ilutimik akornanni atuarfinni nalinginnaasuni atuartinneqarsinnaanngitsut, piginnaasatik naapertorlugit ineriartorluarniarlutik, atuarfinni immikkut neqerooruteqarsinnaasuni atuartinneqarsinnaasariaqarput.
– Tarnikkut timikkullu innarluutit pillugit siornagorniit ullumikkut ilisimasaqarneruleqaagut. Tamakkua ilisimalikkagut atorlugit, arlaatigut innarluutillit qanorpiaq ilinniartinneqarnissaat aaqqissuulluarutsigu iluaqutigineqassasoq nalunngilarput, taamaammat meeqqat inuusuttullu innarluutillit atuartitaanerminni atugaasa pitsanngorsarnissaat aallartisartariaqalerparput. Ullumikut atugassarititaasut siullermik misissuiffigineqarlutik nalunaarsorneqartariaqarput, siunissami pisariaqartinneqartussat aamma naatsorsorsinnaaniarlutigit. Taamatut misissuinermit nalunaarusiaq atuartut innarluutillit atugaat pillugit tunngavilersorluakamik oqallissigineqarnissaa aqqutissiuutissavaa, nutaamik inatsiliuutinngikkutsigit innarluutilinnut aningaasaliissutigineqartartut atorneqarneranni pingaarnersiuilluarnerusinnaaniassagatta.
Meeqqat tarnikkut timikkulluunniit innarluutillit angerlarsimaffimmik avataanni ulloq unnuarlu inissinneqartariaqarsimasut atugarisaat immikkut isigineqartariaqarput.
– Meeqqat innarluuteqarnermik saniatigut aamma isumaginninnikkut atugarliortut, siunissami ikiorsiiffigisinnaaniarlugit, atugarisaat sukumiisumik oqallisigisariaqarpagut, Debora Kleist oqarpoq.