Meeqqat inissinneqartarneri angerlartinneqartarnerilu misissorneqassasut
Ombudsmanip kommunini tamani meeqqat inissinneqartarneranni angerlartinneqartarnerannilu sullisseriaaseq misissuiffiginiarpaa.
Inatsisartut Ombudsmandiata suliniut sulianik meeqqat inissinneqartarnerinut angerlartinneqartarnerinullu tunngasunik qitiutitsisoq aallarnisarniarpaa.
Ombudsmani nittartakkatigut taamatut ilisimatitsissuteqarpoq.
Kommunit sulianik meeqqat angerlarsimaffimmik avataannut innissinneqartarnerinut meeqqallu inissinneqarsimasut angerlartinneqartarinut tunngasunik suliarinnittarnerat Ombudsmandip arlaleriarluni misissuiffigisarsimavaa, ombudsmandilu naapertorlugu misissuisarsimanerit pineqartut kommunit suliarinnittarnerisa isornartorsiorneqarnissaanut tunngavissiisarsimapput.
- Ombudsmandip paasinninnera unaavoq kommunit sulianik meeqqat inissinneqarnerinut angerlartinneqarnerinullu tunngasunik suliarinninnerminni suli ilungersunartunik kukkussuteqartartut, ombudsmandi allappoq.
MIO-mik ataatsimeeqateqarsimaneq
Ombudsmandip Meeqqat Illersuisusat Aviâja Egede Lynge kiisalu meeqqat pisinnaatitaaffiinut sullissivimmi MIO-mi sulisut ajornartorsiutaasartut MIO-p angalanermini misigisarsimasai pillugit apriilip qaammataani ataatsimeeqatiginiarlugit qaaqqusimavai.
Kommunini meeqqat angerlarsimaffiup avataanut inissinneqartarneranni angerlatinneqartarnerannilu ajornartorsiutaasartut pillugit MIO-p paasissutissaatai tunngavigalugit ombudsmandi nammineerluni misissuinermik allartitsiniarpoq.
Ukiamut angalassasoq
Ombudsmandi misissuinermut atatillugu kommunimut arlalinnut angalaniarpoq, tassani Ombudsmandip suliat meeqqanik inissiinernut angerlartitsinernullu tunngasut arlallit misissussavai.
Kommunit sulianik meeqqat inissinneqartarnerinut angerlartinneqartarinerinullu tunngasunik suliarinnittarnerat pillugu nalunaarusiortoqassaaq. Nalunaarusiaq 2022-mi upernaakkut saqqummiunneqassasoq naatsorsuutigineqarpoq.