Meeqqat inissinneqarsimasut Danmarkimut pisarput
Meeqqat Kalaallit Nunaanni ilaquttaminnit arsaarinnissutaasimasut, pisuni ataasiakkaani Danmarkimi meeqqat angerlarsimaffiiniilersinnaasarput.
– Meeqqat sisamat nunatsinneersut Danmarkimi ulloq unnuarlu paaqqinnittarfinnut inissinneqarsimasut ilisimavara. Taakku meeqqat ilaquttaminnit kulturimilu peroriartorfigisaminnit 3.000 kilometerinit ungasinnerusumut inissinneqarsimapput. Ajornartorsiut taanna iliuuseqarfigisariaqarparput, Bonnie Jensen, Ilisimatusarfimmi isumaginninnermik suliaqarnermi immikkoortortami adjunkti taama oqarpoq.
Aviisi Sermitsiaq taamatut allappoq.
Taanna sapaatip-akunnerata siuliani Christiansborgimi tusarniaasoqarnerani oqallissaarivoq, ilaatigut Kalaallit Nunaanni inunnik isumaginnittoqarfiup annermik danskisut tunngaveqarnerat ajornartorsiutaanerarpaa, aamma kalaallit Nunaanni allamut inissiisarnerit nunanut nalinginnaasumik sanilliuttakkatsinnit qaffasinnerujussuunerat.
Kalaallit Nunaanni meeqqanut inuusuttunullu ulloq unnuarlu paaqqinnittarfinnik akuerisanik 23-nik peqarpoq. Taakku meeqqat inissinneqarsimasut affaasa missaat inissaqartippaa, affaallu angajoqqaarsiaasartuniipput. Kalaallit Nunaanni meeqqat katillugit 820-t angerlarsimaffiup avataanut inissinneqarsimapput, tamannalu meeqqat tamarmiusut 4-5 procentiisa missaanniipput.
Ilanngutassiaq tamaat aviisimi Sermitsiami sapaatip-akunnerani matumani saqqummersumi atuaruk, ugguuna iserfigisinnaavat: