Meeqqat illersuisuat: Meeqqat pillugit iliuusissatut pilersaarut naammanngilluinnartoq
Nuna tamakkerlugu iliuusissatut pilersaarut iluatsissappat tamakkiisumik aallaaveqassaaq, Aviâja Egede Lynge oqarpoq. Pilersaarut maannamut taama iluseqartillugu tunngaviusumik allanngorneqarnissaa kajumissaarutigaa.
Meeqqat pillugit nuna tamakkerlugu iliuusissatut pilersaarummik sulineq meeqqat illersuisuata Aviâja Egede Lyngep pakatsissutigisorujussuuaa.
Taassuma angusassamik toraagaqarluni pilersaarutip taama ittup suliarineqarnissaa ukiuni pingasuni sulissutigaa. Inatsisartut ukiakkut ataatsimiinnermi isumaliutissiissut akuersissutigaat, taanna Naalakkersuisup pilersaarummik suliaqarneranut tunngaviliivoq.
- Nuna tamakkerlugu iliuusissatut pilersaarut maanna suliarineqartoq naammanngilluinnarpoq. Isumaliutissiissut Inatsisartut allanngortittariaqarpaat, Aviâja Egede Lynge, Sermitsiaq.AG-mut taama oqarpoq.
Ukiunut qulinut pilersaarutaalajangersimasunik anguniagaqartoq
Meeqqanut allannguissappat, pilersaarut immikkoortunik sisamanik naammassinnittariaqartoq, taassuma oqaatigaa.
- Anguniakkanik aalajangersimasunik anguniagaqassaaq, ukiuni qulini tulliuttuni piffissaq qaninnerusoq aamma ungasinnerusoq eqqarsaatigalugu
- Meeqqanut tamanut pilersaarutaassaaq
- Tamakkiisuussaaq, isumaginninnermullu suliassaqarfimmut killilersorneqassanani
- Suliaqarnermi innuttaasut peqataatinneqassapput
- Nuna tamakkerlugu iliuusissatut pilersaarummut maanna missingiummi ilaatigut takuarput ajornartorsiutit unamminartut meeqqap inuunerani immikkoortut aalajangersimasunut tunngasunngorlugit ajornaallisarneqartut. Suliassaqarfiit assigiinngitsut aallaaviginagit suliniartoqarpoq, meeqqap inissisimaffigisaa tamaat eqqarsaatiginagu. Nuna tamakkerlugu iliuusissatut pilersaarummut siunnersuut maanna atuuttoq meeqqanut tamanut tunnganngilaq. Peqatigitillugu inuiaqatigiit peqataatinneqassapput nunalu tamakkerlugu iliuusissatut pilersaarummut piginneqataasutut misigissagunik, meeqqat illersuisuat oqarpoq.
Ilinniagaqarnermut, piitsuussusermut aamma ineqarnermi atukkanut apeqqutit aamma pilersaarummi ilaanissaat, taanna isumaqarpoq. Tassami meeraq sumiginnagaanngikkaluarluni ajornartorsiutinik aaqqittarialinnik peqarsinnaammat.
Aviâja Egede Lyngep angalanerinit aamma kisissaanngitsunik meeqqanik oqaloqateqarneranit misilittakkat tamanna takutippaat.
- Sumiginnagaanngikkaluarluni atuarnermi ajornartorsiortoqarsinnaavoq. Angajoqqaat piitsuuppata imaluunniit angerlarsimaffik pitsaasuunngippat, meeqqat aamma atugarliortarput.
Neriuuteqartoq
Meeraq sumiginnagaappat imaluunniit atornerlunneqarpat, taama aamma tamakkiisumik iliuuseqarnissaq pisariaqartoq, meeqqat illersuisuat isumaqarpoq.
Kalaallit Nunaat Naalagaaffiit Peqatigiit meeqqat pillugit isumaqatigiissutaat naammassiniarlugit pisussaaffeqalernikuuvoq. MIO angalalluni misissuinermini Kalaallit Nunaata immikkoortut isumaqatigiissummiittut mninnerpaamik malinngikkai paasisaqarpoq.
Inatsisartuni ataasinngormat oqallittoqarnerata kingorna, meeqqanut iliuuseqarnissap nukittorsarneqarnissaanik ataatsimut neriorsuuteqarnermi, Aviâja Egede Lynge neriuuteqarluarpoq, taamatullu piumassuseqaqqilerneq ukiunut qulinut iliuusissatut pilersaarusiornermut atorneqarnissaa neriuutigaa, innuttaasut peqataatillugit aamma isumaginninnikkut suliniutinut piginneqataasutut misigitillugit.
- Meeqqat tamarmik pitsaasumik inuussapput. Taamaattumik nuna tamakkerlugu pilersaarummik siunissamut qanittumut ungasissumullu isigisumik, nunatsinni kulturikkut aaqqissuussaanikkullu assigiinngissutsinut isiginniffiusumik pisariaqartitsivugut. Iliuusissatut pilersaarut meeqqanut tamanoortoq, inuiaqatigiinnut annguttussaq, naalakkersuisoqarfinni kommuninilu sulinermi atortussatuinnaq atuutinngitsoq.
MIO juulimi nalunaarusiamik, meeqqat isaannit aallaveqartumik nuna tamakkerlugu iliuusissatut pilersaarutip suna aallutarissaneraa pillugu siunnersuuteqarniarpoq.