Skip to main content

Meeqqat Illersuisuat: Meeqqap isaanit takusiuk

Ilinniartitsisut Kattuffiannit IMAK-imit ilinniartitsisut imminut illersornissamut pikkorissartinneqarnissaat piumasarineqarpoq, uumisaaarisarneq persuttaasarnerlu ilinniartitsisut ilaannut ulluinnarsiutinngorsimanerat pissutigalugu. Meeqqat Illersuisuat isumaqarpoq, meeqqat peqqarniitsumik pissusilersortarnermikkut ikiortissarsiornertik takutittarmassuk kommunit meeqqanut ikiuuttariaqartoq.

Ilinniartitsisut atisaannik alittuisarneq meeqqallu akornanni annersaattoqartarnera ilinniartitsisunut ataasiakkaanut unammillernartaaqaat.

Ilinniartitsisut annertunerusunik akisussaaffilerneqartarput, ilinniartitsisummi meeqqat peqqarniitsumik pissusilersorsimasut pillugit angajoqqaanut attaveqartussaallutillu kommunimut nalunaaruteqartussaapput.

Meeqqat Illersuisuat isumaqarpoq, ajornartorsiortoqarneranik takussutissaasoq, atuarfimmi pisut sakkortuut pakkersimaarniarlugit ilinniartitsisut imminut illersornissamut pikkorissarnermik ujartuilersimanera.

- Ilinniartitsisut iliuusissaaleqinerat nukillaarnerallu paasilluarsinnaavara. Apererusuppungali: Sooruna ajornartorsiutip pissutaa misissornianngikkipput, meeqqallu iliuusaannut suna takussutissaanersoq aperinngitsugut? Meeqqat Illersuisuat Aviâja Egede Lynge aperivoq.

- Meeqqat ikiorneqarnissaannut pisussaaffeqarneq

Meeqqat Illersuisuata imminut illersortarneq allatulluunniit iliuuseqarsinnaaneq pitsaanerunersoq isummerfigerusunngilaa. Kommuninullu sakkortuumik kammattuutigaa, meeqqat uumisaarisartut allanulluunniit persuttaasartut pillugit akisussaaffimminnik tiguseqqullugit.

- Kommunit meeqqat taamatut inissisimasut katsorsarneqarnissaat ikiorserneqarnissaallu pisussaaffigaat. Meeqqat taamatut pissusilersortarnermikkut oqaasinnguinissamik suli ilikkarsimannginnertik takutittarpaat, Aviâja Egede Lynge oqarpoq.

Meeqqat Illersuisuat naapertorlugu, sumiginnaaneq assigiinngitsorpassuartigut ersertarpoq – ilaatigut kamattarnikkut aamma sakkortuumik pissusilersuuteqarnikkut. Immaqa meeqqat angerlarsimaffimmit tarnikkut persuttaaffiusumeersuupput, ilikkarsimallugulu pakatsinerit, nalorninerit aamma toqqissisimannginnerit sakkortuumik pissusilersornikkut
taamaallaat ersersissallugit, Meeqqat Illersuisuat oqarpoq.

Ilinniartitsisut ilitsersorneqartarnissaat

Ilungersunartunik pisoqarsimaneranik saaffiginnittartut amerliartuinnarmata IMAK qisuariarsimavoq. Meeqqat sakkortuumik pissusilersortarnerannik ajornartorsiut aaqqiiffigineqassappat, nuna tamakkerlugu meeqqat atugaannik misissuisoqartariaqartoq Aviâja Lynge Egede isumaqarpoq.

- Ajornartorsiut tamanna kommunit iliuuseqarfigissagaat pillugu IMAK-ip kissaataa tapersersorpara. Uannut tamanna inuiaqatigiinni annertunerusumik ajornartorsiuteqarnermut takussutissaavoq: Meeqqat pissusilersuutaat atugarliornerup takussutissartaraa, arlaatigullu sumiginnarneqarsimanermik tunuliaqutaqarpoq, Aviâja Egede Lynge oqarpoq.

Meeqqat Illersuisuat isumaqarpoq, ajornartorsiut siullertut meeqqap isaanit takuneqartariaqartoq, meerarmi mianernarnerpaavoq. Ilinniartitsisunut supervision kiisalu atuarfiup tungaanit “ajutoortoqarnissaanut utaqqiinnarnani” siusinaarluni ujartuisarnerup nukittorsarneqarnissaa innersuussutigai.

Ilinniartitsisut kommunit iliuuseqarnissaannik kissaateqarnerannut tapersiinermi saniatigut kaammattuutigaa, ajornartorsiut nuna tamakkerlugu misissuinikkut misissorneqassasoq uppernarsarneqassasorlu, taamaasilluni annertussusaa takuneqarsinnaassammat.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER