Meeqqat Illersuisuat: Meeqqanut innarliisimannginnermut uppernarsaat naammanngilaq

Meeqqat Illersuisuata Aviâja Egede Lyngep Ivaaqqap nakkutilliisunit nalilerneqarnera isornartorsiorpaa, taannami isumaqarpoq meeqqanut innarliisimannginnermut uppernarsaat akuttunngitsumik piniarneqartarnissaa meeqqat allallu illersornissaanut naammanngitsoq.

Arnaq 23-nik ukiulik innarluuteqartorlu, kinguaassiutitigut atornerlungaareernermi kingorna meerartaareersorlu, Meeqqat illersuisuat Ivaaqqamut pulaarpoq.

- Apeqquserusutara unaavoq nunatsinni isumannaallisaanermut ingerlatseriaaseq eqqarsaatigalugu meeqqanut innarliisimannginnermut uppernarsaat sooq taama initutiginersoq, meeqqat illersuisuat Aviâja Egede Lynge oqarpoq.

Taama isummerpoq ulloq unnuarlu angerlarsimaffimmi Ivaaraqqami nakkutilliisut naliliinerata kingorna. Namminersorlutik Oqartussat Nakkutilliinermik Ingerlatsiviata 2020-mi nakkutilliiartornermi kingorna Ivaaqqami sulisut meeqqanik kinguaasiutitigut atornerluisimannginnerannut uppernarsaataannik piumasarnissamik ukkassinerussasut innersuussutigisimavaat.

- Meeqqanut innarliisimannginnermut uppernarsaat maanna qanoq innermik takutitsisuujuaannarpoq, taanna iluatsissappat suna tamarmi aaqqissuussaalluartariaqarpoq. Innarliisimannginnermut uppernarsaat namminermi ajunngilluinnarpoq, taannali kisiat naatsorsuutigineqarsinnaanngilaq, ingammik meerartatta uanilu pineqartumi innarluutillit pineqartillugit, Aviâja Egede Lynge oqarpoq.

Nalunaarutigineqarnikuunngitsut, uppernarsaatissaaleqineq imminullu nakkutigineq

Meeqqat illersuisuata oqaatigaa, ukiut arfineq marluk ingerlaneranni nunatsinni sumiiffiit 40-t tikissimallugit, taamaalilluni inuiaqatigiinni mikisuni kinguaassiutitigut atornerluinerit nalunaarutigineqanngitsut arlalippassuit naammattoortarsimallugit.

- Tassa imaappoq inoqarsinnaavoq meeqqanut innarliisimannginnermut uppernarsaateqaraluarlutik meeqqanut allanulluunniit innarliisartunik, taanna oqarpoq.

Aviâja Egede Lyngep ilanngullugu oqaatigaa nalunaarutiginninnerit amerlasoorpassuit eqqartuussivimmi suliassanngortinneqarneq ajortut.

- Meeqqat atornerlunneqarsimagaluarlutik uppernarsaatissaaleqineq peqqutaalluni suliassanngortitsisinnaanngitsut MIO-mi naammattoortaqaagut, Aviâja Egede Lynge oqarpoq.

Taassuma ilanngullugu oqaatigaa, nunatsinni kinguaassiutitigut kannguttaatsuliornerit paqumigineqartorujussuusut inuiaqatigiillu imminnut nakkutigisorujussuummata, inersimasut akornanni ikioqatigiinnerujussuaq atorneqartoq.

- Taamaattumik ajornanngippallaaqaaq nakkutilliisutut oqassalluni, meeqqanut innarliisimannginnermut uppernarsaat taannaassasoq ulloq unnuarlu paaqqinnittarfiup Ivaaqqap siunissami isumannaallisaasussaa, taanna oqarpoq.

Sulisunut piumasaqaatit sukaterneqassasut

Meeqqat illersuisuat isumaqarpoq, Ivaaqqami pisoq assigiinngitsutigut pinaveersaartinneqarsinnaasoq, periarfissaareersut eqqarsaatigeqqinneratigut.

Sulinermi atugassarititaasut ingerlariaatsillu pilersinnerisigut tamakkua pinaveersaartinneqarsinnaapput, soorlu nangilersuinermi uffaanermilu inuit marluk peqataasarnissaannut piumasaqaateqareersoq.

Meeqqat illersuisuat suliniutigineqarsinnaasunik arlalinnik siunnersuuteqarpoq:

  • Paaqqinnittarfiit akuerisaasut tamarmik sulisut piginnaasaannik nalunaarutiginnissinnaasariaqarput
  • Paaqqinnittarfinni sulisunut piumasaqaatit sukaterneqarsinnaapput
  • Paaqqinnittarfimmi akuersissut piumasaqaatinut naapertuutinngippat utertinneqarnissaa periarfissanngortinneqarsinnaavoq
  • Sulisunik screenerisoqarsinnaavoq

Naggataatigut Aviâja Egede Lyngep oqaatigaa, paaqqinnittarfimmut Ivaaqqamut arlaatigut kinguneqartitsisoqarsinnaasoq.

Uani pineqartumi Namminersorlutik Oqartussat akisussaasuuvoq, kisianni sooruna akiligassiinikkut kinguneqartitsisoqanngitsoq? Inatsit unioqqutinneqarpoq, sooruna kinguneqartitsisoqanngitsoq? Piumasaqaat sakkortuvoq kisianni meeqqanut innarliisimannginnermut uppernarsaatit naammanngitsut ilimavarput, taamaattummik nutaamik eqqarsartariaqalerpugut, meeqqat illersuisuat Aviâja Egede Lynge oqarpoq.

Powered by Labrador CMS