Meeqqat illersuisuat: Inersimasut meeqqat illersornagit imminnut illersorusunnerupput

Aviâja Egede Lynge isumaqarpoq, meeqqat oqariartuutaat sumiginnaasimasut imminnut illersornerannit aporfeqakulaarpallaartut.

Aviâja Egede Lynge ukiuni tallimangajanni meeqqat illersuisuattut maanna atuutereerpoq. Piffissami pineqartumi MIO-mi suleqatini peqatigalugit nunami sumiiffiit assigiinngitsut 40-t, meeqqat ilaqutariillu takunnissimasutut nassuiaataannik katersiniarlutik tikittarsimavaat.

Meeqqat oqaluttuarisimasaannik saqqummiussigaangami qisuariaat aalajangersimasoq ataaseq tusartuaannangajappaa.

- MIO uangalu inuttut tatigineqannginnitsinnut nukippassuit atorneqartartut takusarpara. Oqarfigineqartarpugut ilisimasanik uppernarsarneqarsimanngitsunik saqqummiussisartugut. 'Aviâja tamakku kisitsisaatiginngilatit', nalinginnaasumik qisuariaatigineqartarpoq, Aviâja Egede Lynge oqaluttuarpoq.

- Uanga takunnissinnaanera naapertorlugu, tamanna pisarpoq ajornartorsiutiviusumit allamut saasaariniarluni. Tassa meeqqanik sumiginnaasimaneq takujumanagu suliavut tatigisaajunnaarsinniarneqartarput.

Oqariartuutinik apuussisoq

Meeqqat illersuisuata oqaluttuaraa, meeqqat atugaannut tunngatillugit ajornartorsiummik qanorluunniit ikkaluartumik tikkuussigaangami taamatut imminut illersorneq takkuttuaannartoq. Isumaqarporlu tamanna kukkulluinnartumik nukinnik atuinerusoq.

- Saqqummiussavut eqqortuunersut apeqqusersorlugit nukinnik taamatut atuisarneq nukillalaarnartarsinnaavoq. Nukiit meeqqat ikiornissaannut atorneqartariaqaraluartut.

- Uangami meeqqat oqariartuutaannik apuussiinnartarpunga, taamaammat ajornartorsiutit uppernarsarneqarsimanngitsut oqaatigineqaraangat misigisimasarpunga, meqqat innuttaasullu nikassarneqartut.

- Aviâja Egede Lynge, MIO-p isornartorsiorneqarsinnaaneq sapinngittariaqanngilaa?

- Sapinngittariaqarpaa. Suliavummi suleriaaserpullu ineriartortittuartussaagatsigit tamanna pisariaqartipparput. Matumanili pineqartoq allarluinnaavoq. Matumani pineqarpoq meeqqat qanoq oqariartuuteqarnerannik tusarnaartoqarneq ajornera. Tassa pissusiviusunik takunnikkusuttoqannginnera.

- Meeqqat oqariartuutigisartagaasa tatigineqartannginnerat akulikitsumik misigisarpara.

- Ilisimasat qanoq annertutigisut pigineqartariaqarpat?

Aviâja Egede Lyngep erseqqissaatigaa, suliaqarfimmut tunngatillugu ilisimatusarnerit kisitsisillu amigaataasut isumaqatigilluinnaramiuk. Tamatumunngali tunngatillugu MIO pilersinneqarnikuunngilaq, soorlu aamma arfiniliinnarnik sulisoqarami pineqartunik misissuinissamut isumalluutissaqanngitsoq.

- Peqatigitillu aperisariaqarpunga, iliuuseqartoqassappat ilisimasat qanoq annertutigisut pigineqartariaqarpat.

- Meerarpassuit inuunerminni ajornartorsiutinik ilungersunartunik oqaluttuartarnera naammannginnami?

Aviâja Egede Lyngep itisiliiffigerusunngilaa, imminut illersorluni isuariartarnerit sakkortuut sumi misigisarsimanerlugit, oqaluttuaraali sumi tamangajammi tamanna atuuttartoq. Tassa atorfilittat, politikkerit inuinnaallu tamarmik taamatut qisuariartarput.

- Taamatut oqareerlunga, innuttaasut amerlasuut suliatsinnik paasinninnerulersimapput.

Powered by Labrador CMS