Meeqqat Illersuisuat: Ernumanermik isumatsassimanermillu erloqissuteqartut qassiunerannik ilisimasaqannginneq aarleritsannarpoq
Ernumaneq isumatsassimanerlu pillugit ilisimasanik katersisoqarnissaa Aviâja Egede Lyngep ujartorpaa.
Inuit qassit ernumanermik isumatsassimanermillu aqqusaagaqarsimanersut kisitsisaatigineqannginnerat naammaginanngilaq. Meeqqat Illersuisuat Aviâja Egede Lynge taama isumaqarpoq.
Paragraf 37 atorlugu apeqquteqartoqareerneratigut paasinarsivoq ajornartorsiutip qanoq annertutigineranik ilisimasaqartoqanngitsoq. MIO-lli nunatsinni angalasareernermini, inersimasut meeqqallu nikallunganermik taaqqunganermillu ilungersuuteqartartut inerniliussinnaavaa.
- Nikallunganermik taaqqunganermillu ajornartorsiuteqartartut qassiunersut ilisimaneqanngimmat isumaalunnartippara. Meeqqammi inuunerminni tarnikkut atugaat pillugit aaqqissuussaasumik paasissutissanik katersisoqartarnissaa pingaaruteqarluinnarmat, Aviâja Egede Lynge tusagassiutinut nalunaarummini allappoq.
Ilisimasanik amigaateqartoqarnera tikkuaannanngilaa, aammali erseqqissaatigalugu meeqqat atugaat pillugit ilisimasanik katersisoqarnissaanik ilisimasanillu pigeriikkanik nalilersuisoqarnissaanik, Naalagaaffiit Peqatigiit Meeqqanut komitéata Kalaallit Nunaat kingullermik 2017-imi erseqqissumik kajumissaaruteqarfigisimagaa.
- Matumani pisoq aaqqiivigineqartariaqarpoq. Nunatut immitsinnut pisussaaffilereerpugut meeqqat ikiorneqarnissaminnut pisinnaatitaaffeqarnerat eqquutsissallugu, meeqqallu illersussallutigit peqqissuutissallutigillu. Alloriarnerlu siulleq tassaasussaavoq ajornartorsiutip qanoq annertutiginerata paasiniaqqaarnissaa. Kalaallit Nunaanni paasissutissanik atorluarneqarsinnaasunik katersisoqassasoq inassutigerusuppara, kisitsisit taartutut taaneqartartut qassiunersut ilisimaneqanngitsut ilisimaneqalerniassammata , Meeqqat Illersuisuat Aviâja Egede Lynge oqarpoq.