Meeqqat illersuisuat: Aaqqissuussaanerup mumisinnissaa pisariuallaanngilaq
Pisortat aaqqissuussaanerat ilaqutariinnut tulluanngilaq, Aviâja E. Lynge ICC-mut oqarpoq. Kisianni tamatuma allanngortinnissaa ajornarpallaartariaqanngitsoq, taanna ilanngullugu oqarpoq.
Aaqqissuussaanerup ilaqutariinnut tulluarsagaannginnera pissutigalugu meeqqat sumiginnarneqarput. Siuliani oqaluttuareriikkatsitut, meeqqat illersuisuata Aviâja Egede Lyngep videokkut aallakaatitakkut ICC-p ataatsimeersuarnerani oqalugiaataani oqariartuutit qitiusut ilagaat.
Kisianni allanngortitsinissaq taama pisariutigisariaqanngitsoq, taanna nangilluni oqarpoq.
- Ilaqutariit taakkuupput inuunerminnik ilisimaarinninnerpaasut, taakkulu aamma artorsarnerpaat ilisimavaat ilaqutariinnerminni inuunerminni suut pitsanngoriartissinnaanerlugit.
- Qulaanit aaqqiissutissatut ilusilersuinernut, sungiusimasatsinnut taarsiullugu, ilaatinneqarnissaminnut pisussaaffeqarput inuunermullu pitsaanerusumut ingerlanissaminnut nammineq aqutsisutut misigisimalernissamut.
- Tusarnaartutut sivikitsunnguamik misiliguk, takorloorlugu inuunerit qanoq pitsanngoriartinnissaanut takorloorsinnaanerit aperineqarlutit. Misiliguk eqqarsaatigalugu, inummik allamik aggertoqartoq oqarluni, inuunerit allanngortissagit, illit sanilliussinnaasutut misigisinnaanngisannik, nammineerfigisinnaanngisannik kinaassutsinnullu tulluanngitsumik. Qanoq misigivit? Kajumissaarneqartutut misigivit?
- Illuatigut takorloorukku pineqartup kinaasutit nalunngikkaatit, peqataatikkaatit illillu peqatigalutit anguniagaq takorlorrsinnaallugu, qanorlu tassunga pisinnaaneq ilisimallugu, taava qanoq misigivit?
- Ilaqutariinnut aaqqissuussinermik tulluarsaaneq pillugu suliaqarnermi alloriarneq siulleq tassaavoq, ilaqutariinnik peqataatitsineq, ilaqutariillu sumiiffiisa ileqquinik aallaaveqarneq. Matumani ukiuni kingullerni pingasuni MIO-mi peqataatitsinermik periuseq nutaaq misilittarsimavarput, tassani aallaavigaagut tulluarsarlutalu sumiiffinni kulturit, paqumigisat attaveqaqatigiittariaatsillu. Taamaasilluta meeqqat ilaqutariillu tusassallugit, sammisat paqumigisat qiterisaat angunissaat kiisalu taakku siunnersuutaat innersuussutaallu aanissaat iluatsissimavarput. Matumani sulinitsinni tunngavittut malittarisassaq pingaarnerpaaq tassaavoq inuit naligalugit naleqartillugillu sullissineq.
- Tassalu suleriaaseq inunnik naligiimmik isiginnittariaaseqarfiusoq aallartiffissatsialaavoq, Aviâja Egede Lynge oqalugiaammini naggasiivoq, taanna allaaserisap qulaani assi toorlugu tamaat isiginnaarsinnaavat.