Meeqqat illersuisuat: Aaqqissuussaanermik ingerlatseriaaseq allanngortinneqassaaq

Meeqqat illersuisuata Aviâja Egede Lyngep Kalaallit Nunaanni meeqqat atugaat pineqartillugit, aamma pineqartut sumulluunniit attuumassuteqaraluaraangata erseqqissumik oqaaseqartarnini ilsimaneqaatigaa. Reykjavikimi Arctic Circle Assemblyqartoqarnerani oqaaseqarami aamma erseqqissuliorpoq.

Najugaqarfinnut 34-nut pulaaraangami, meeqqat qanoq inuuneqarnerannik ilisimalikkani oqaluttuarai: meeqqat piitsuusut, meeqqat atornerluiffiusumi angerlarsimaffillit, meeqqat persuttarneqarsimasut kinguaassiuutitigulluunniit atornerlunneqarsimasut, kingusinaartumik ikiorserneqartarneq imaluunniit ikiorserneqanngilluinnartarneq, ilinniagaqarnissamut pisinnaatitaaffik pimaarunneqartoq, tamakkuupput ajornartorsiutit ilungersunartut ilaattut erseqqissaaffigisai.

Ikiorneqarnissamik qinnuteqarneq ajortut

Oqaaseqarnermini pingaarnertut oqariartuutigaa, inuiaqatigiit innuttaminnik aallaaveqarnissaat pisariaqartoq – tassa innuttaasut aaqissuussaanermut allanartumut naleqqussarneqartarnerannut taarsiullugu. Tassani inuiaqatigiit inunnik ataasiakkaanik tunngaveqarlutik aaqqissuussaanerata aamma qangatut inuiaqatigiit ataatsimut isigalugit aaqqissuusaanerup akornanni aporfeqarsinnaaneq tikkuarpaa.

- Tunngaviusumik ileqqutta naleqartitalu ilaat meerartatsinnik inuusuttortatsinnillu illersuisimasut ajorseriarsimapput. Ajoraluartumik takusinnaavarput, inuit ikiorsiissutaasartullu akornanni qunneq annertunerulersimasoq nalorninarsisimasorlu, Nogle af vore grundlæggende normer og værdier, som har beskyttet vore børn og unge er blevet svækket. Vi ser desværre at afstanden mellem mennesker og hjælpeforanstaltninger er blevet stor og fremmedgørende, Aviâja Egede Lynge oqaaseqaamminut ilanngullugu oqarpoq.

Assersuutitut taavaa, nunat killiit ingerlatseriaasiat malillugu inuusuttut ikiorserneqarnissamut saaffiginnittartussaasut. Kalaallilli meerartaasa inuusuttortaasalu MIO-mut oqaatigisarsimavaat, orninneqarlutik ikiorserneqartarnissartik pisariaqartillugu. MIO-p tamanna tunngavigalugu nammineq periusissaq suliarisimavaa, tassani inuusuttut ataatsimoortillugit naapinneqartassapput, taakkulu inuunerat eqqarsaataallu aallaavigalugit iliuuseqartoqartassalluni.

- Assersuutitut atukkajuttarpakka, nukappiaqqat niviarsiaqqalluunniit nipaallutik klassimi tunorlerpaami issiasartut. Meeraq imaasinnavoq ajoqutigilersimasaminik nammataqartoq, nipaatsuunerlu ileqqorigatsigu oqaaseqarneq ajortut. Taamaammat meeraq pisariaqartitaminik ikiorserneqarneq ajorpoq, Aviâja Egede Lynge Sermitsiaq.AG-mut oqarpoq.

- Inuiaqatigiinni uagutsitut inukitsunnguusumi pisortatigut aaqqissuussaq inunnut qaninnerujussuaq pisariaqartipparput. Tassunga atatillugu apeqqutigineqartariaqarpoq: Meeraq nipaatsumik inuusoq qanorpiarmita ippa – sunimmita pisariaqartitsiva?

Ilisimatuut suleqatigiinnerorusuttut

Tamakkua saniatigut najukkani ataasiakkaani inuiaqatigiit aallaavigineqartarnissaannik pisariaqartitsisoqartoq erseqqissaassutigaa. MIO-mmi assigiinngissutsit annertusinnaanerujussuat ilisimasaqarfigaa. Nunaqarfimmi ataatsimi kinguaassiuutitigut innarliisarnerit ammasumik oqaluuserineqarsinnaasut, nunaqarfimmi allami isertuussisoqarsinnaavoq.

- Isumaqarpunga oqaluuserisara ilaatigut Alaskami Canadamilu inunnit tigulluarneqartoq, taakkumi aaqqissuussami kulturitsinnut naapertuutinngitsumi ajornartorsiutaasartut ilisarisinnaavaat, Aviâja Egede Lynge Sermitsiaq.AG-mut oqarpoq

- Ilisimatuut aamma periusissiaq MIO-p suligaangami malittagaa tusarusuttupilussuuaat.