Meeqqat illersuisuata uparuaaneq eqqissisimalluni tiguaa

Siumumi ilaasortap, Ruth Heilmannip, meeqqat illersuisuat Sermitsiaq.AG-kkut ataasinngornermi ullup qeqqalernerani uparuarpaa. Taassumami meeqqat akerliussutsimik takutitsinermi septembarip 30-ani peqataatinneqarneranni illersuisoq sumiissimanersoq ujartorpaa.

Ruth Heilmannimummi tupannarsimavoq meerarpassuit Naalakkersuisunut akerliussutsimik takutitsinermi peqaatinneqarsimanerat.

- Naak, maani nunami meeqqat illersorneqarnerat?, Ruth Heilmann ataasinngornermi ullup qeqqalernerani taama aperivoq.

Atuaruk: Ruth Heilmannip meeqqat akerlioqataatinneqarnerat tupaallaatigigaa

MIO-mut attuumassuteqanngilaq
Maanna meeqqat illersuisuat, Aaja Chemnitz Larsen, Ruth Heilmannip uparuaaneranut akissuteqarpoq.

- Uparuaanermi uani paaqqinnittarfinni atuarfinnilu atorfilittanut uparuaasoqartariaqaraluarpoq, taakkuami angajoqqaat akuersissutaannik piniarsimanngillat, aamma angajoqqaat akerliussutsimik takutitsinernut meeqqamik peqataasarnissaannut isummersimanngitsut uani isigineqartariaqarput. Uparuaaneq tamanna MIO-p inatsisitigut aalajangersakkatigut suliassaanut attuumassuteqanngilaq. Angajoqqaat sulisullu tamanna akisussaaffigaat, Aaja Chemnitz Larsen oqarpoq, imalu itisiliilluni:

- Akerliussutsimik takutitsineq naatsorsuutigineqartumit sakkortuneruvoq. MIO oqallinnerup ilaanut Facebookikkut malinnaavoq. Kisianni angajoqqaanit allanilluunniit saaffigineqanngilagut. Taarsiullugu kaammattuutigissavarput paaqqinnittarfiit atuarfiillu siunissami qanoq iliortoqartarnissamut oqaloqatigineqassasut.

Atuaruk: Akerliussutsimut takutitsinermut aaqqissuisoq: Peqqissimissuteqanngilagut

Atuaruk: Aleqa: Akerliussutsimik takutitsisut sakkortungaarmata isumaqarlunga aallaaneqalerlunga

Meeqqat illersuisuat akerliusinnaatitaavoq
Ruth Heilmanni aamma ilanngullugu oqaluttuunneqarsimavoq meeqqat illersuisuat akerliussutsimik takutitsinermut peqataasimasoq. Tamannalu tupannaralugulu eqqarsarnartoqartippaa.

- Naak, meeqqanut illersuisoq? Paasitinneqarpunga taanna akerliussutsimik takutitsinermi aamma peqataasimasoq, tamanna annilaarnarpoq eqqarsarnartoqarlunilu, Ruth Heilmann taama oqarpoq.

Kisianni meeqqat illersuata, Aaja Chemnitz Larsenip, innersuussutigaa kinaluunniit inersimasoq tunngaviusumik pisinnaatitaaffeqartoq akerliussutsimik takutsinernut peqataanissaminut imaluunnit isummersorsinnaanissaminut.

- Akerliussutsimik takutitsinermut peqataasinnaatitaavunga, aamma tamanna aalajangiusimavara, Aaja Chemnitz Larsen oqarpoq.

Siunnersuutit tallimat
Taarsiullugu meeqqat illersuisuata Ruth Heilmann siunnersorpaa meeqqanut ulluinnarni pisinnaatitaaffimminnik atuisitaanngitsunut samminninneroqqullugu.

- Meeraqarpoq ulluinnarni annersarneqartartunik, sumiginnarneqartartunik piitsuusunillu. Tassa taakkua meeqqat MIO-p suliassaqarfii, aammalu politikkikkut taakkununnga samminninneroqqusilluta kaammattuivugut, Aaja Chemnitz Larsen oqarpoq.

MIO, ’Meeqqat Inuusuttullu Oqaloqatigiinnittarfiat’ meeqqat akerliussutsimik peqataateqqinnginnissaannut tallimanik siunnersuusiorsimavoq.

Siunnersuutit uani takukkit.