Skip to main content

Meeqqat Illersuisuata tarnikkut persuttaaneq pillugu inatsisiliortoqarnissaa piumasarivaa

Naalakkersuisut qanigisariinni persuttaasarneq akiorniarlugu iliuusissatut pilersaarutaat nutaaq alloriarneruvoq pitsaasoq, kisiannili naammaginanngilluinnarpoq, taamatut isumaqarpoq meeqqat illersuisuat. Taassuma tarnikkut persuttaaneq pillugu inatsisiliortoqarnissaa piumasaraa.

- Ullumikkut tarnikkut persuttaasarneq inatsisitigut unioqqutitsinerunngilaq, tassa tarnikkut persuttaaneq akiorniarlugu inatsiseqanngimmat, Aviâja Egede Lynge oqarpoq. 

Nunap meeqqat tarnikkut persuttarneqannginnissaannut illersuinissaanut pisussaatitaaffia NP-p Meeqqat pillugit Isumaqatigiissutaani taaneqaraluartoq, Kalaallit Nunaat persuttaasarnermut taama ittumut akiuiniarluni suli inatsiseqanngilaq, Meeqqat Illersuisuat ilisimatitsivoq.

Aviâja Egede Lynge taamaammat politikerinut ’policy brief’-imik taaneqartartumik allagaqarsimavoq, ajornartorsiutip annertussusaanik naatsumik takussutissiisumik kiisalu ajornartorsiummik iluarsiinissamut innersuussutinik imaqartumik.

- Inersimasut meeqqanik paarsilluarsinnaanngorunik aatsaat meerartaartuugunik pitsaanerussagaluarpoq, meeraq ataaseq MIO-p 2017-imi Qeqqata Kommunianiinnerani oqarsimavoq.

LÆS OGSÅ: Naalakkersuisut: Inuiaqatigiinni nakuusertarneq unitsissavarput

Meeqqat Illersuisuata Qeqqata Kommunianiinnermini meeqqat timikkut tarnikkullu persuttarneqartarsimasut naapissimavai. Meeqqat Illersuisuata maanna piumasaraa, tarnikkut persuttaaneq pillugu inatsisiliortoqarnissaa, isumarporlu Naalakkersuisut iliuusissatut pilersaarutaat naammanngilluinnartut.

-Tarnikkut persuttaasoqartarnera inuiaqatigiinnit akuersaaginnarneqartassanersoq maanna apeqqusissallugu piffissanngorpoq. Tarnikkut persuttaasoqartarnerata akuersaarneqarsinnaannginnera tamatumalu ajortuunera pillugit erseqqissumik nalunaaruteqartoqarnissaa piffissanngorpoq, meeqqat illersuisuat Sermitsiaq.AG-mut oqarpoq.

Danmarkimi tarnikkut persuttaaneq akiligassinneqarnermik imaluunniit ukiut pingasut angullugit parnaarussaanermik kinguneqarsinnaasarpoq. 

Ullumikkut angerlarsimaffimmi tarnikkut persuttaasoqarsimanera oqartussanit paasineqaraangat, kommuni meeqqamik angerlarsimaffiup avataanut inissiisinnaavoq. Pinerluttulerinermulli inatsimmi tarnikkut persuttaaneq ilaatinneqanngilaq, inatsimmi pineqatumi timikkut persuttaaneq kinguaassiuutitigullu innarliinerit pineqaatissiissutaasarput.

- Meeraq tarnikkut persuttagaasimasoq inuunermi sinnerani ilungersunartunik kingunerluuteqarsinnaavoq. Taamaammat tamatuma suli inerteqqutaannginnera akuersaarneqarsinnaanngilaq, Aviâja Egede Lynge oqarpoq.

Meeqqat persuttaasart amerlanertigut pinngitsoorsinnaaneq ajoraat

Meeqqat Illersuisuata erseqqissaassutigaa, meeqqat inuusuttullu inuit tarnikkut persuttaasartut amerlanertigut pinngitsoorsinnaaneq ajoraat. Tarnikkut misigissutsikkullu kingunerluutaasinnaapput kissaatigineqanngitsutut ajattugaasutullu misigineq, tamatuma nassatarisinnaavai attaveqarnissamut ajornakusoortitsineq, kingunerlutsitsinerit, ernumaneq annilaanganerlu, toqqissisimannginneq aamma imminut naleqartinnginneq, nanertisimaneq aamma imminut toqukkusuttarneq, meeqqat illersuisuat oqarpoq.

LÆS OGSÅ: Nuummi qimarnguik: Naalakkersuisut anguniagaannut piareersarpugut

- Tamanna annermik ajornartorsiutaavoq, tarnikkut persuttaaneq meeqqat inuusuttullu imminnut naleqartinnerannut kiisalu inuunerup ingerlateqqinnissaanut piginnaasaannut aseruisarmat. Taamaattumik piffissanngorpoq, tarnikkut persuttaasarneq akiorniarlugu inatsisiliortoqarnissaa, taanna oqarpoq. 

Naalakkersuisuts 'Angajoqqaat meeqqanik sumiginnaasarnerat akiorniarlugu nuna tamakkerlugu iliuusissanut pilersaarut 2020-2030' tunngavigalugu suliniuteqarniarput. Iliuusissatut pilersaarutitigut qulakkeerneqassaaq Naalakkersuisut ilaqutariinni persuttaasoqartarnera pinaveersaartinniarlugu siunnerfeqarlutik piffissarlu ungasinnerusoq eqqarsaatigalugu suliaqarnissaat. 

Persuttaasarnermut inatsisiliortoqarnissaanik piumasaqarnerup saniatigut MIO-mi inassutigineqarpoq, nunami meeqqat inuusuttullu ajornannnginnerusumik tarnikkut ikiorserneqartarnissaat.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER