Meeqqat atugaat
Meeqqat illersuisuata Kujataa maanna misissorpaa
Aviâja Egede Lynge, meeqqat illersuisuat, MIO peqatigalugu Kujataanukassapput. Tassani illoqarfiit pingasut aamma nunaqarfiit sisamat tikeraassavaat
Meeqqat illersuisuat Aviâja Egede Lynge qaammatip tulliani Kujataanukassaaq, meeqqat atugaat pillugit ilisimasaqalerniarluni, meeqqat inersimasullu tungaanniit isigalugu.
Tamanna 23. april – 11. maj 2016 pissaaq, meeqqat pisinnaatitaaffiinik suliaqartoq MIO angalanermi peqataassaaq.
Atuaruk: MIO-p suliniutit makkua ingerlatissavai
Ilisimasat annertusarneqassasut
- Uannut pingaarutilerujussuuvoq meeqqat qanoq innerat tusassallugu, sutigullu pisinnaatitaaffiisa eqquutsinnissaannut suliniarneq nukittorsarneqarsinnaanersoq. Aamma pingaaruteqartorujussuuvoq pissutsit taakkua tungaanniit takussallugit, tamanna aallaavigalugu pisinnaatitaaffiinik siunnersuisinnaaniassagatta ilitsersuillutalu, Aviâja Egede Lynge tusagassiuutinut nalunaarummi oqarpoq.
MIO-p ilisimatitsissutigaa angalanermi meeqqat, inuusuttut inersimasullu pisinnaatitaaffinnut ilisimasaat nukittorsarniarlugit ilitsersuiniarlutillu isumaqarpata meeqqat pisinnaatitaaffii unioqqutinneqartut. Angalaneruttaaq MIO ilisimasanik tunissavaa, MIO-p meeqqat pisinnaatitaaffiinik qulakkeeriniarnermut pitsanngorsaanera nukittorsarniarlugu.
Oqaloqatigiinnerit
Angalanerup nalaani innuttat MIO-mik oqaloqateqarnissaannik periarfissinneqassapput kissaatigigaanni kinaassutsimik isertuussilluni. Aammattaaq atuartunik sammisaqartitsisoqassaaq, kommuni ataatsimeeqatigineqassalluni, meeqqanik sullissisunik meeqqat pisinnaatitaaffiinik pikkorissaasoqassaaq, kiisalu elevhjem MIO-mit pulaarneqassalluni.
Uku tikinneqassapput: Narsarsuaq, Qassiarsuk, Narsaq, Qaqortoq, Alluitsup Paa, Nanortalik kiisalu Aappilattoq.
Atuaruk: Meeqqat illersuisuat: Atuartut pikkorinnerit aamma puigorpagut