Meeqqat illersuisuat ukiuni sisamani ingerlaqqissaaq

Aviâja Egede Lynge Meeqqat illersuisuattut 2015-imili atorfeqarpoq. Naalakkersuisut aalajangerpaat 2025-ip tungaanut atorfimminiissasoq.

- Meeqqat Illersuisuattut ingerlaqqinnissara nuannaarutigeqaara. Meeqqanut suliat uummammioraakka, qilanaarpungalu suliamma ingerlateqqinnissaanut, Aviâja Egede Lynge Sermitsiaq.AG-mut oqarpoq.

Meeqqat illersuisuattut atorfik inuttassarsiorneqarsimalerpoq Naalakkersuisullu isumaqarput Meeqqat illersuisuat pillugu Inatsisisartut inatsisaanni aalajangersakkat Meeqqallu illersuisuata suliassai piginnaasassaalu tunngavigalugit Aviâja Egede Lynge qinnuteqartuni piukkunnarnersaasoq.

- Maannakkut suliakka itinerusumik suliarisinnaalerpakka. Ukiunut sisamanut tulliuttunut suleriaasissarput piareersarnikuuara. Arlalinnit kaammattorneqarpunga ingerlaqqissasunga, tamanna soorunami akisussaaffimmik tunniussivoq, oqarpoq.

Suliaq pingaarutilik

Isumaginninnermut, Ilaqutariinnut, Inatsisinik Atuutsitsinermut Peqqissutsimullu Naalakkersuisoq Martha Abelsen ima oqarpoq:

- Aviâja Egede Lyngep toqqarneqarneratigut meeqqat illersuisuattut atorfiup ingerlanneqarnerata allannguuteqanngitsumik ingerlaannarnissaa qulakkeerneqarmat nuannaarutigaara. Meeqqat pisinnaatitaaffiisa qulakkeerneqarnissaannik suliaqarneq ukiuni kingullerni annertuumik angusaqarfiusimavoq taamaammat meeqqat illersuisuata meeqqat illersuisoqarfianik ineriartortitseqqinnissaa suliallu pingaaruteqaqisup ingerlaqqinnissaa malinnaavigissallugu qilanaaraara.

Naalakkersuisut Meeqqat illersuisuat pillugu aamma Meeqqat pillugit Siunnersuisoqatigiit pillugit Inatsisartut Inatsisaat malillugu Meeqqat illersuisuannik toqqaasarput, toqqarneqartorlu Meeqqat pillugit Siunnersuisoqatigiinni aamma siulittaasuussaaq. Meeqqat illersuisuat ukiuni sisamani atuuttussatut toqqarneqartarpoq. Toqqaaqqittoqarsinnaavoq, Namminersorlutik Oqartussat ilisimatitsipput.