meeqqat inuusuttullu
Meeqqat illersuisuat: Meeqqat ukiuat naammanngilaq
Inuiaqatigiinni inuuniarnikkut assigiinngitsunik atugallit tamaasa ilaqutariinnik meeqqanillu peqqissunik inoqartinniarutsigit, taava meeqqanut ukioritinneqartut qulikkaat ataatsit marlulluunniit pisariaqartippagut, meeqqat illersuisuat Aviâja Egede Lynge isumaqarpoq
Naalakkersuisut siulittaasuata Kim Kielsenip (S) ukiortaami oqalugiarnermini ukioq 2016 meeqqat ukiuattut suaarutigaa.
Tamannali naammanngilaq, meeqqat illersuisuat Aviâja Egede Lynge taama isumaqarpoq.
Taassuma minnerpaamik ukiut qulikkaat ataatsit meeqqat ukiuisut pisariaqartinneqartut tikkuarpaa, meerarpassuarnik ilaqutariippassuarnillu atugarliortoqarnera inuaqatigiittut nassuerutiginninnissamillu ujartuivoq, aammalu suliniuterpassuugaluit iluaqutaasimanngitsut apeqquserlugit.
Atuaruk: Kielsen: 2016 meeqqat ukiorissavaat
Ajornartorsiutit nassuerutigitigit
- Soorlu nalunngikkipput ilaqutariinni kinguaariiaat tamarmiullutik ajornartorsiuteqartut, aamma inuiaqatigiinnguit akornanni tamarmiullutik naalliuttut. Inuiaqatigiit tamakkerlugit akuutissagutsigit aallartissutigalugu nassuertariaqarpugut malitsigalugulu isummertariaatsigut pissusinnaarisartakkagullu oqallisigerusunngisagut allanngortariaqarpagut, tusagassiuutinut nalunaarummi allappoq.
Atuaruk: Taasiilami meeqqat affaat inuuniarnermikkut ajornartorsiorput
Meqqat illersuisuata erseqqissaatigaa, tatsorsaariaatsit nutaat kikkunnut tamanut atuuttut innuttaasut oqallisigisariaqaraat, unaannaq isigalugu annaasseriartarnerit sivisunerusumik iluaqutaaneq ajortut naluneqanngimmat.
Ingerlaqqitta
- Piffissanngorpoq innuttaasut ajornartorsiutillit oqallisigiinnarnagit oqaloqatigissagigut, Aviâja Egede Lynge oqarpoq.
Qaasuitsup Kommunia, Kommuneqarfik Sermersooq (Tasiilaq) aamma Kommune Kujalleq isumaginninnikkut suliassaq kivissinnaannginnamikku ikioqqullutik maanna nalunaarsimasut, taassuma tikkuarpaa.
- Tamatta nalunngilarput kommuunit inunnik isumaginninnermik siunnersortinik amigaateqartut aamma suli ukiorpassuarni inunnik isumaginninnermik siunnersortinik amigaateqassasoq. Tamanna oqallisiginerani meeraq ataaseq aamma tarnikkut ataavartumik ajoqutissaminik ajoquserpoq, meeqqat illersuisuat Aviâja Egede Lynge taama oqarpoq.
Atuaruk: Kinguaassiuutitigut atornerluinerup pitsaanerusumik pinaveersaartinnissaa ujartorpaa
Atuaruk: Meeqqat atugaat Kim Kielsenip aamma meeqqat illersuisuata eqqartorpaat