meeqqat inuusuttullu
Meeqqat illersuisuat: Meeqqat artorsarnerini tapersersorsigit
Meeqqat ajutoornermik eqqugaangaangata, pingaaruteqarpoq pisoq pillugu oqaloqatigissallutigit, meeqqat illersuisuat Aviâja Egede Lynge oqarpoq
Sapaatit akunnerisa marlussuit ingerlanerini Kommuneqarfik Sermersooq sakkortuunik arlalinnik pisoqarfiusimavoq.
Amerlasuunut piffissaq artornartuuvoq, inuillu arlallit toqqaannartumik eqqorneqartut, ilisarisimasat innuttaasullu allat eqqorneqartarput ajutoornerit takkukkaangata. Taamaammat meeqqat Illersuisuat Aviâja Egede Lyngep meeqqat piffissami uani oqimaatsorsiorfiusumi tapersersoqquai.
Pisoq eqqartorsiuk
- Meeqqat ajutoornermik eqqugaangaangata, pingaaruteqarpoq pisoq pillugu oqaloqatigissallutigit. Meeqqat allatuulli, pisariaqartittarpaat, ilisimalissallugu susoqarnersoq. Meeqqalli suna tamaviat ilisimasariaqanngilaat, eqqaamassavarpullu meeqqap ukiuinut inerisimaneranullu oqaatsitta naleqqussarnissaat, Meeqqat Illersuisuat tusagassiuutinut nalunaarummi allappoq.
Alianartumik pisoqartillugu meeqqat assigiinngitsumik qisuariartarnerat erseqqissarpaa.
- Ilaat attortittaqaat, allalli meeqqat, soorlu pisut qaangipallannerusaraat. Pissusissamisoorluinnarpoq, meeqqat pisoq pillugu arlaleriarlutik apersuutigippassuk, paasissutissallu annikitsukkaarlugit perusuttarmatigit. Sapinngisat naapertorlugu akisassaatit, akissutissaqanngikkuillu, tamanna meeqqamut oqaatigissavat.
Meeraq piareersaruk
Meeqqat assersuutigalugu ilisisuni, ingerlaaqatigiittuni assigisaanniluunniit peqataassappata pitsaasuuvoq meeraq piareersassallugu susoqarnissaanik oqaluttuullugu, inuit ilaasa immaqa aliasussinnaanerannik. Meeqqat peqataaqqullugit kajumissaarneqarsinnaapput, taamaallaalli peqataasinnaallutik namminneq kissaatigippassuk, meeqqat illersuisuat oqarpoq.
Inersimasut iliuusissaminnik nalornigunik, meeqqallu sakkortuumik sivisuumillu qisuariarpata, Meeqqat Illersuisuata Aviâjap kajumissaarutigivaa assersuutigalugu Misi imaluunniit Qitiusumik Ilaqutariinnut Saaffiginnittarfiup siunnersuisarfia saaffigeqqullugit oqaloqatigeqqullugillu qanoq iliortoqarsinnaaneranik.