Meeqqat illersuisuat: Marloriaammik sumiginnaaneq

Meeqqat ikiortariaqarnerpaasut Kommuneqarfik Sermersuumi isumaginninnikkut oqartussanit sumiginnarneqarnerpaasarput.

Nakkutilliinermik ingerlatsiviup isumaginninnermut naalakkersuisoqarfimmit nalunaarusiap tamanna naqissuserpaa.

- Nakkutilliisut nalunaarutaat toqqissimanarnanilu sakkortoqaaq, meeqqat illersuisuat Aviâja Egede Lynge oqarpoq.

Angajoqqaat angajoqqaatut akisussaaffimminnik naammassinninngippata kommuni iliuuseqartussaatitaasoq, taassuma naqissuserpaa.

- Nakkutilliisut nalunaarutaata takutippaa pisortat ingerlataat ajalusoortoqartillugu ikorfartuisussaagaluartut, tassa angajoqqaat meeqqanillu isumaginnittussat isumaginnissinnaajunnaarneranni ikorfartuilertussaagaluartut, meeqqanik sumiginnagaareersunik annertoorsuarmik pisortat sumiginnaaqqittut, Aviâja Egede Lynge oqarpoq.

- Nalunaarusiami tamanna taaneqarpoq ”pisortat sumiginnaanerat”-nik.

- Uanga tamanna taassavara ”marloriaammik sumiginnaaneq”-mik, Aviâja Egede Lynge oqarpoq.

Naalagaaffiit Peqatigiivisa meeqqat pillugit isumaqatigiissutaannik maleruagassanik arlalinnik kommuni unioqqutitsisoq, taanna naliliivoq. Ilaatigut illersorneqarnissamik pisinnaatitaaffik, meeqqat allamut inissinneqarsimasut immikkut illersorneqarnissaannut pisussaaffeqarnermut tunngavoq, isumaginninnermut tunngatillugu meeqqat pisinnaatitaaffeqarneranut tunngavoq, naammaginartumik inuuniarnikkut atugaqarnissamut pisinnaatitaaffeqarnissamut tunngavoq.

Meeraq angajoqqaaminit sumiginnarneqartoq, sullissisussat pisortaqarfiillu piginnaaneqarluartumik, aaqqissuulluakkamillu meeraq qitiutillugu ikiortussaagaat, taanna naqissusiivoq.

- Inatsisit tamarmik, ingerlatsinernilu tamani aamma meeqqat pisinnaatitaaffiisa salliunneqartuarnissaat qitiutinneqartussaavoq, meeqqat illersuisuat oqarpoq.

Kommuneqarfik Sermersuumi aalajangersimasumik, ungasinnerusumut isigaluni aaqqiissutaasinnaasumik tamakkiisumillu meeqqanut ilaqutaanullu iliuuseqartoqarnissaa anguniarneqartariaqartoq taanna kajumissaarivoq.