Meeqqat illersuisuat Kujallermi pisut eqqasuutigai

Meeqqat Illersuisuata Kommune Kujallermi meeqqat inuusuttullu sullinneqarnerisa oqallisigineqarnerat malinnaaffigisimavaa, ilaatigullu meeqqanik inissiinerit arlallit.

Atuaruk: Kommune Kujalleq isumaginninnerup tungaatigut ikiortissarsiorpoq

Allagaatit tammartut
Sulianut tunngasut allagaatit tammartut, pineqartut tusarniaaffigineqanngitsut inatsisinillu unioqqutitsinerit Kommuni Kujallermi pissutsinik allaaserineqartuni ilaannannguaraat.

Namminersortut nakkutilliisitaata tamanut nalunaarutigisimavaa, FN’ip Isumaqatigiissutaa Meeqqat Pisinnaatitaaffiinut tunngasoq malinneqanngitsoq.

Atuaruk: Isumaginnittoqarfik tukattoq paasisat nutaat uppernarsarpaat

Pisut eqqasunnartut
- Tusagassiutini pissutsit allaaserineqartut tamarmik eqqasunnartorujussuupput. Tusagassiutitigut oqallinneq kisiat aallaavigalugu oqaaseqarnianngilanga, pisariaqartilluguli pineqartut tusarnissaat, tassa meeqqat, meeqqat illersuisuat Aviâja Egede Lynge tusagassiuutinut nalunaarummi ilisimatitsivoq.

- Paasisaqarfigerusupparattaaq suut misissorneqarsimanersut, aaliangiunneqarsimanersut suullu meeqqanut pitsaanerpaaq anguniarlugu aaqqiissutaasimanersut, ilanngullugu oqarpoq.

Septembarimi
Meeqqat illersuisuat - Kommuni Kujallermukarnissaminut pilersaaruteqarpoq 3. – 18. september, nakkutilliinermilu nalunaarusiaq ujartorsimallugu Ilaqutariinnermut, Naligiisitaanermut, Isumaginninnermullu Naalakkersuisoqarfiup Nakkutilliisuata suliarisimasaa, taannalu sapaatip akunnerani uani utaqqimaarneqarpoq.

Meeqqat Illersuisuata angalanermut siunertaa tassaavoq, meeqqat innuttallu tusarnissaat peqataatinnissaallu, meeqqat Kujataani naliginnaasumik atugaannik annertunerusumik ilisimasaqalerusulluni.