Meeqqat illersuisuat aarlerisaarivoq: Meeqqat qulinik ukiullit ikiaaroortarput

Meeqqat illersuisuat Aviâja Egede Lynge 11. maj 2016 KNR-ip radiukkut oqallitsitsinerani Oqalliffimmi peqataavoq. Meeqqat Illersuisuat sullissisut politikerillu Nunatsinni ikiaroornartumik ajornartorsiuteqarneq pillugu isummaminnik saqqummiussueqataanissaminnut periarfissaqartunut kiisalu tamanna pillugu innuttaasut apeqqutaasa akinissaannut peqataavoq.

Atuaruk: Meeqqat allaat 11-iinnarnik ukiullit hashitortarput

Meeqqat aamma eqqortarai
Taassuma nuannaarutigaa, ikioroornartumik atornerluineq sammineqarmat-

- Ikiaroornartumik atornerluisoqarnerata sammineqarnera nuannaarutigaara. Ikiaroornartumik atornerluinerup inersimasut kisiisa eqqornagit, meeqqat inuusuttuaqqallu aamma eqqortarpai. Inussuttuaqqanit inersimasuniillu ilaqutariinni atornerluisoqarnera pillugu oqaluttuarineqartunik arlalinnik tusarnikuuvunga ilisimasaqarpungalu meeqqat allaat 10-12-inik ukiullit ikiaroortarnerannik, meeqqat illersuisuat oqarpoq nangillunilu:

- Meeqqat inuusuttuaqqallu ikiaroornartumut stoffinullu allanut illersorneqarnissaminnut pisinnaatitaaffeqarput, tamanna Meeqqat pillugit Isumaqatigiissummi artikel 33-mi allaqqavoq.

Pissutaasut tunuliaqutaasut
Aviâja Egede Lyngep ikiaroornartumik atornerluinermi pissutaasut tunuliaqutaasut isiginiarneruneqarnissaat pingaaruteqartutut isumaqarfigaa. Ikiaroortarlernermununa suut peqqutaasut? Kingornussat avatangiisillu pillugit oqallinnerup saniatigut atornerluinermi misigissutsinut tunngasut isigineqartariaqarput.

Ikiaroornartup eqqarsartaaseq malussartaatsillu sunnertarpai kiisalu misigisimasanut imaluunniit misigisimasanut sakkortuunut pitsaanngitsunut ersiutinut katsorsaatitut atuussinnaalersarluni. Meeqqat illersuisuannut saaffiginnissutit arlallit tamanna uppernarsarpaat:

Atuaruk: Hashi oqallisigisassanut ilaasoq

Ikorfartorneqarnissaq pingaaruteqartoq
- Inuusuttuaranngoriartuaalernermi misigissutsillu assigiinngitsut takkussuutileraangata, angajoqqaanit ikorfartorneqarsinissaq oqaloqateqarnissarlu pingaaruteqarput. Taama pisoqanngippat, inuttut ikorfartorneqannginneq misigineqarsinnaavoq naleqartutullu misiginartarluni. Samungarsuaq nakkaassimagaanni angajoqqaanut saaffiginninnissaq ajornarnerulersarpoq, avatangiisillu pitsaanngitsut ikiaroornartumik misileraaffiusut atornerluinermillu kinguneqartut peqataaffigineqalersarput, (Inuusuttoq, 17-inik ukiulik).

Meeqqat illersuisuata oqallinnerup ikiaroornartumillu atornerluinerup pinaveersaartinnissaata sammineqaannarnissaa neriutigaa, ingammik meeqqanut inuussuaqqanullu tunngatillugu, kiisalu meeqqanut inuusuttuaqqanullu atornerluisunngoreersimasut katsorsatsinnissaannut periarfissat qulakkeerneqarnissaannut tunngatillugu.

Atuaruk: Politiit hashi 375 kiilu arsaarinnissutigaat