ataatsimeersuarneq

Meeqqat ilinniartitaanermik pisinnaatitaqarnerat pillugu Meeqqat Ataatsimeersuarnerat

Inuussuttut nunatsinneersut Ilulissani ilinniartitaaneq pillugu ataatsimeersuassapput, ataatsimeersuarnermi Nakuusa MIOlu aaqqissuisuupput

Ukioq mannattaaq meeqqat ataatsimeersuarneranni ”Meeqqat tamarmik ilinniarnissamik pisinnaatitaaffiat” qulequtarineqassaaq. Siorna inuusuttut meeqqat atuarfiata qanoq pitsangorsarneqarsinnaaneranik kaammattuutinik suliaqarput. Inuusuttut tuluit oqaasiinik ilinniartitsinerup siusinnerusukkut allartittarnissaa vikarinillu atuinerup annikillisinneqarnissaa ilaatigut kaammattuutigaat.

Nakuusa tusagassiuutinut nalunaarummi paasissutissiivoq.

Aamma atuaruk: Nakuusap suliniutaanit angusat siulliit

Ilinniartitaaneq sammineqarniartoq

Ukioq mannali inuusuttut meeqqat atuarfiannit ilinniartitaanermut ikaarsaariarnerat sammineqassaaq. Meeqqat atuarfiannit soraarummeertut 50 procentii atuarfimmi naammassinermik kingorna ingerlaqqinngitsoortarnerat misissuinerit arlallit ersersippaat, maannalu Nakuusa MIOlu pissutsit qanoq ililluni pitsanngortsinneqarsinnaanerannik inuusuttunit ikioqqupput.

Inuusuttut ulluni tallimani sammisamik aallussissapput. Ilaatigullu Christian aamma Frederik Elsner workshoppertitsissapput.

Workshoppertitsisut nuannaartut

- Aperineqarnerput nuannaarutigeqaarput. Suliassaq imaannaanngitsuusoq isumaqarpugut, uagulli nammineq misilittakkatsinnik ilanngussillutalu nukittuffigisavut inuusuttut peqatigalugit iluaqutiginissaat qilanaaraarput. Qulequtarineqartoq ilinniartitaaneq pingaarpoq. Marluulluta nammineerluta unammilligassaqarsimavugut inuiaqatigiillumi eqqarsaatigalugit aallussinissaq pingaaruteqarpoq. Ilinniartitaaneq patajaatsumik amerlanernik periarfissaqarluni siunissaqarnissamut toqqammavissiisarpoq, inuiaqatigiinnulli tamarmiusunut ineriartornissamut aamma toqqammavissaavoq, Christian Elsner oqarpoq.

Qatanngutigiit Elsnerikkut saniatigut inuusuttut ilaatigut Maren-Louise Poulsen Kristensenimit, Katrina Boassenimit, Nina Skydsbjerg Jacobsenimit Josef Tarrammillu ikiorneqassapput.

Kommuninit tamanit

Meeqqat ataatsimeersuarneranni inuusuttut Qaasuitsup kommunianit, Qeqqata kommunianit, Kommuneqarfik Sermersuumit Kommune Kujallermiillu peqataassapput. Taakku ataasinngornermi ulloq 9. oktoberimit arfininngorneq 14. oktober Ilulissani ataatsimuussapput. Inuusuttut 37-it kommuniminni meeqqat sinnissaanneersuupput 13-illu 18-llu akornanni ukioqartuullutik.

Aamma atuaruk: Assit takukkit: Nakuusa meeqqanut ataatsimeersuartitsivoq

Powered by Labrador CMS