Meeqqat Ikiortigit: Tasiilami suliniuteqarneq salliutinneqarli
Ineriartorneq mumisinniarlugu Tasiilami suliniuteqarneq salliutinneqartariaqartoq, ikiuiniaqatigiiffik Meeqqat Ikiortigit Kalaallit Nunaat taama isumaqarpoq.
Piviusulersaarummi aallakaatitassiami ”Byen hvor børn forsvinder”-imi takutinneqartunut, meeqqanut ikiuiniaqatigiiffimmut Meeqqat Ikiortigimut assut aalassatsitsipput.
- Inuit arlaqartut Rikketut aammalu Naasunnguatullu sulissuteqartut Kalaallit Nunaanni meeqqat inuusuttullu atugarisaat pitsanngortinniassallugit sulissuteqartut amerlammata. Red Barnet Kalaallit Nunaat qujamasoqaaq inuit sapiissuseqarlutik uummateqarluarlutillu meeqqat inuusuttullu sullittarmatigit. Qujamasuuteqaqaagullu soqutiginnillutik DR maani nunatsinni annertuunik qanoq iliuuseqarluta sorsutatsinnut takutitsisimammata, ikiuiniaqatigiiffik tusagassiuutinut nalunaarummi allappoq.
Ajorluinnartoq
- Nukiit atorneqarsinnaasut tamarmik pisariaqartippagut, suliaq annertooq meeqqat inuusuttullu pisinnaatitaaffiisa ingerlatiinnarnissaanut. Pitsanngoriartortoqarpoq, tamanna inuiaqatigiinni misissuinerup 2018-meersup takutippaa, taamaakkaluartoq eqqissilluta pinissatsinnut piffissaanngilaq. Kalaallit Nunaanni meeqqat iluamik toqqissisimanartumillu ineriartornissaat sulissutigalugu suli sorsuutigisariaqarparput.
Ikiuniaqatigiiffik isumaqarpoq, inuunermik imaqarluartumik isumalimmillu meeqqanut inuusuttunullu toqqamaviliinissaq suliarujussuusoq annertooq, meeqqat inuusuttullu kinguaassiuutitigut atornerlugaasimasut, persuttarneqarsimasut, aanngajaarniutinik imigassamillu atuisuusunik eqqugaasimasut aammalu peroriartornerminni arlaatigut innarlerneqarsimasunut:
- Meeraq inuusuttuararluunniit ikiortissarsiornermini ikiortissaqanngikkaangat ajorluinnarpoq. Inunnik isumaginnittoqarfinnut nalunaaruteqartoqarsimatillugu eqqortumik ikiuisoqarsimanngikkaanga aamma ajorluinnarpoq. Tamanna iluarsisariaqarparput – meeraq ikioqquppat ikiuisinnaasariaqarpugut.
Tasiilami suliniuteqarnerup salliutinneqarnissaa
Taamaattumik Meeqqat Ikiortigit kajumissaarivoq, Tasiilami suliniuteqarneq salliutinneqartariaqartoq.
- Maannakkut suliniuteqarnerit pilersinneqarsimasut naammanngitsutut ernumanartoqartippagut, tassami sumiginnaagaasimanerit annertummata. Imminut toquttarnerit amerlaqisut kisitsisaasa takutippaat tamanna, pingaaruteqarporlu tusarnaartoqarnissaa qanorlu iliuuseqartoqarnissaalu. Nunarput akissaqanngilaq qanoq iliuuseqanngittoornissaminut, meeqqagummi inuusuttagullu siunissaat eqqarsaatigissagaanni. Kanngutsaattuliortartunik arlaatigulluunniit innarliisartunik pilersitsiuarnissamik akissaqanngilagut. Aaliangersimasunik sullissisussanik amigaateqartoqarpat, Meeqqat Ikiortigit taama oqariartuuteqarput.