Meeqqat Ikiortigit Namminersorlutillu Oqartussat suleqatigiittut: Meeqqat kinguaassiutitigut atornerlunneqartarnerannut akiuiniarneq suli ingerlanneqarpoq

Meeqqat Ikiortigit aamma Pitsaaluiunermut Isumaginninnermullu Aqutsisoqarfik meeqqat kinguaassiutitigut atornerlunneqartarnerannut akiuiniarlutik suleqatigiilerput.

Meeqqat Ikiortigit aamma Pitsaaliuinermut Isumaginninnermullu Aqutsisoqarfimmut meeqqat kinguaassiutitigut atornerlunneqartarnerisa unitsinneqarnissaannut suliniutit nukittorsarniarlugit suleqatigiilerput.

Tamanna pivoq Naalakkersuisut kaammattuinerat malillugu.

Meeqqat Ikiortigit tusagassiutinut taama nalunaaruteqarput.

- NGO-tut suliniuteqartuusutut Meeqqat Ikiortigit-mit toqqaannartumik attaveqarfigisarpagut meeqqat, inuusuttut
inersimasullu, taamatullu taaneqartutut ikioqatigiilluta suleqatigiinnikkut innuttaasunut, qanoq iliorluta meeqqanik atornerluisarnerit killilerlugillu unitsinnissaat pillugit oqariartuutaasut avammut siammarsatitersinnaalissavagut
oqaloqatigiissutigisinnaalissallugillu , Meeqqat Ikiortigini siulittaasoq Jonna Ketwa tusagassiutinut nalunaaruteqarluni oqarpoq .

Takorluukkat assigiittut

Meeqqat Ikiortigit tusagassiutinut nalunaarutimini ilisimatitsissutigaa meeqqat kinguaassiutitigut atornerlunneqartarnerisa unitsinneqarnissaannut takorluukkat anguniakkallu assigiittut pigalugit.

- Taamaattumik suleqatigiinneq illuatungeriinnit marluusunit tunngavissaqarluartutut siunnerfeqarluartutullu isumaqarfigigineqarpoq, soorlu atuagassiaaqqat Killiliisallu quppersagaliaani imarisaasut siunnerfiusullu eqqarsaatigalugit.

Suliaqaqatigiiffiullu erseqqissarpaa Naalakkersuisut Killiliisa atorlugu anguniagaat takorluugaallu Meeqqat Ikiortigimit aamma soqutigineqartut.

- Kinguaassiutitigut atormerluisarneq inuppassuarnut oqallisigissallugu paqumminartutut isigineqartarpoq. Taamaattumik suleqatigiinnermi anguniarneqarpoq atortussanik paasiuminarlutillu atoruminartunik ineriartortitsillunilu atuuttussaanngortitsinissaq, pineqartut suunerinik paasiuminarsaataasunik.

- Tamannalu pissaaq ilaatigut atuagassiaaqqanik, ukiunut assigiinngitsunut, soorlu meeqqanut inuusuttunullu, angajoqqaanut, oqartussaasunut, ilinniartitsisunut aammalu atornerluinermik pilersitsisunut 18-it inorlugit qaangerlugillu ukiulinnut, naleqqussagaasunik, pilersitsinikkut, Meeqqat Ikiortigit tusagassiutinut nalunaaruteqarlutik allapput.

Kalaallit Nunaanni Meeqqat Ikiortigit suliniutaanut ilaassapput unnukkut sammisaqartitsinerit, atuarfinnut pulaarnerit, suliffeqarfinni ingerlatsiviusunilu saqqummiinerit aamma naatsumik filmilortitsineq kiisalu kinguaasiuutit pillugit ataatsimoorluni nammineerluniluunniit qanoq killiliisinnaanerit.

Powered by Labrador CMS