Meeqqat Gentoftemeersut Tasiilami ilaqutariinni najugaqaqqissanngitsut

Meeqqat atornerlunneqartarsimanerannik nalunaarusiap saqqummiunneqarnerata kingorna, kommunip meeqqat Tasiilami ilaqutariinni unnuisinneqartarnerat unitsippaa

Gentofte Kommunemi atuartut Tasiilami ilaqutariinni unnuisinneqaqqissanngillat. Tamanna ilaatigut aalajangiunneqarpoq, illoqarfimmi meeqqat pingasuugaangata ataatsip kinguaassiuutitigut atornerlunneqartarnera pillugu piviusulersaarut takutinneqareersorlu.

Gentoftep kommuniani pisortaaneq Torben Frølich Radio24syv-imut oqaluttuarsimasoq Jyllands-Posten allappoq.

- Tamanna naammalerpoq, pissutsillu taakkorpiaat tunngavigalugit oqartariaqarpugut atuariartortut Tasiilami ilaqutariinni najugaqartarnerat attatiinnarsinnaanngikkivut, Jyllands-Posten naapertorlugu kommunemi pisortaaneq Radio24syv-imut taamatut oqarsimavoq.

Inersuaq sinittarfik

Gentofte Kommunep ukiuni 30-ni meeqqat 5. klassemi atuartut ukiut tamangajaasa Kalaallit Nunaannut atuariartortittarpai. Meeqqat Kalaallit Nunaanniikkaagamik Tasiilami ilaqutariinni ulluni qulini unnuisinneqartarput.

Maanna kommune aalajangerpoq, meeqqat inersuarmi siunissami unnuisinneqartalissasut.

Tasiilaq paasissutissarpassuit nuanniitsut pillugit tusagassiorfinnit sammineqalermat aalajangiisoqarpoq.

Maajip qaammataani DR-kkut piviusulersaarut "Byen, hvor børn forsvinder" aqqutigalugu oqaluttuarineqarpoq, meeqqat pingasuugaangata ataaseq kinguaassiuutitigut atornerlunneqarsimasartoq.

Peqatigitillugu Kalaallit Nunaanni Politiit sammisaq pillugu nalunaarusiaminnik qanittukkut saqqummiussipput. Nalunaarusiami takuneqarsinnaavoq, Tasiilami meeqqat 2014-imiit 2018-imut kinguaassiuutitigut atornerlunneqarsimasut pillugit nalunaarutit 191-iusut. Illoqarfik 2000-it missaanik innuttaqarpoq.

Gentofte Kommunep pisortaanerata Radio24syv-imut oqaatigaa, danskit meerartaasa kinguaassiuutitigut atornerlunneqarsimasinnaanerannik ernumassuteqarnissamut tunngavissaqanngitsoq.

- Ilisimalikkavut tunngavigalugit qisuariartariaqarsimavugut, Jyllands-Posten naapertorlugu taanna Radio24syv-imut oqarsimavoq.

Paasissutissat nuanniittut

Paasissutissat nuanniittut tunngavigalugit danskit naalakkersuisui aalajangersimapput, Sermersooq Kommunimi, Tasiilap inissisimaffigisaani ikiuigasuartussanut aningaasaliissuteqarniarlutik.

Katillugit 5,3 millioner koruunit immikkoortinneqarsimapput, Børne- og Indenrigsminiteri Astrid Krag (S) sisamanngormat paasissutissiivoq.

- Aningaasat isumaginninnermi siunnersortinut, tarnip pissusaanik ilisimasalinnut ilaqutariinnillu katsorsaasartunut atorneqassapput. Taakku suliassarpassuit suliarineqarsimanngitsut pillugit kommunimut ikiuutissapput, aammali meeqqqanut isumagineqareersimasunut ikorfartuissapput, Astrid Krag sisamanngormat oqarpoq.

Powered by Labrador CMS