Meeqqat eksemeqartut pillugit suliaq: Peqqinnissaqarfik nalilersorneqassaaq

Peqqissutsimut Naalakkersuisup Kiista L. Fenckerip meeqqat angajoqqaatik peqatigalugit Kalaallit Nunaanni peqqinnissaqarfimmit ikiorserneqanngitsutut misigisimallutik Danmarkiliarsimasut eqqumaffigaa.

Suliat ataasiakkaarlugit oqaaseqarfigisinnaannginnerarpai, oqaatigaluguli angajoqqaat Danmarkimi peqqinnissaqarfik periarfissat kingullersaattut isigilersimammassuk ajuusaarnartuusoq.

- Soorunami meeqqat angajoqqaallu allanut ikiortissarsiornissamik periarfissaqanngitsutut misigisimanerat ajuusaarnarpoq. Peqqinnissaqarfipput saffigalugu toqqissisimanartussaavoq, Peqqissutsimut Naalakkersuisoq Kiista L. Fenckeri Sermitsiaq.AG-mut oqarpoq.

Naalakkersuisup ilisimatitsissutigaa, suleriaaserineqartartut innersuussinissamullu piumasaqaatit peqqinnissaqarfimmi sulisunut napparsimasunullu erseqqissuutinneqarnissaat qulakkeerniarlugu naalakkersuisoqarfimmit peqqinnissaqarfiup suleriaaseqarnera nalilersortinneqartoq.

- Peqqinnissaqarfimmi sullissisarnerup naammaginarnersoq paasiuminarnersorluunniit imaluunniit atugassarititaasututut atuuttunut naleqqussarneqassanersoq nalilersorlugu ingerlapparput, Kiista L. Fenckeri oqarpoqr.

Sulisussanik amigaateqartoqartoq

Kiista L. Fenckerip oqaatigaa, innuttaasut ilarpassui amimikkut ajoquteqartut, soorlu eksemeqarlutillu amimikkut panertoortartut. Misissuisimanerit takutissimavaat, silaannaq panertoq issilu aamma timip sananeqaatai inuppassuarnut eksemeqartitsilerlutillu amermik panertitsisartut.

Taamaammat nappaatit assigiinngitsut, taakkununnga ilanngullugit eksemeqarneq aannertuumillu eksemeqarneq eqqarsaatigalugit ikiorsiissutissaqartoqarnersoq innersuusseriaaserlu paasiniarlugit misissuisoqartoq oqaatigineqarpoq.

Naalakkersuisup aamma erseqqissaassutigaa, nakorsat peqqinnissatigullu sulisut allat Kalaallit Nunaanni peqqinnissaqarfimmi sulilersinnaanera ammaanneruniarlugu naalakkersuisoqarfimmi sulisoqartoq.

Peqqinnissaqarfimmi sulisut ullumikkut Kalaallit Nunaanni peqqinnissaqarfimmi sulissagunik danskit kalaallilluunniit akuersissutaannik peqatariaqarput. Nakorsat danskit akuersissutaannik peqartussaapput, peqqinnissaqarfimmili sulisut allat kalaallit akuersissutaannik peqartariaqarlutik.

Angajoqqaanulli napparsimasunullu nakorsiarnermi ilaquttamik ilagisaqartunut siunnersuutigaa:

- Soorunami nakorsap peqqinnissaqarfimmilu sulisup akisussaaffigaat, napparsimasup katsorsartinnissap qanoq ingerlanneqarnissaanik paasisaqarnissaa. Angajoqqaanulli napparsimasunullu siunnersuutigerusuppara, nakorsiarnerminni ilaquttaminnik ilaqartaqqullugit, apeqqutigineqartunik tamanik nakorsallu naliliineranik eqqaamannittoqarnissaa qulakkeerniarlugu, naalakkersuisoq oqarpoq.

Taassuma ilanngullugu oqaatigaa, napparsimasut angajoqqaallu qularuteqarnerminni apeqqutissaqarnerminnilu peqqinnissaqarfimmi napparsimasunut ilitsersuisartumut saaffiginnittuaannarsinnaasut.