Meeqqat atugarliortut: Angerlarsimaffiup avataanut inissiisoqartinnagu pinaveersaartitsisoqartassaaq
Kommuneqarfik Sermersooq suliniutissatut allattorsimasut aallaavigalugit suliaqartassaaq, tassani suliassat allannguivallaartussaanngitsut aallarniutigineqartassallutik
Kommuneqarfik Sermersuumi meeqqat atugarliortut sullinneqartarnerat malittarisassat erseqqissut malillugit siunissami ingerlanneqartassaaq. Meeqqat ilaqutariillu atugarliortut pillugit politikkimi, ataatsimiititap akisussaasup maanna ataatsimiinnermini eqqartugaani tamanna takuneqarsinnaavoq.
Kommunip tamatuminnga qulakkeerinninniarluni periuseriniagaata ilagaat, suliniutissatut allattorsimaffik malillugu allannguivallaartussaanngitsunik aallartittarnissaq. Aatsaallu allanik periarfissaarulluinnarnermi kommuni angerlarsimaffiup avataanut imaluunnii ulloq unnuarlu paaqqinnittarfimmut inissiisarniarpoq.
Siullertut pinaveersaartitsineq isumagineqassaaq, tamanna aallartinneqartassaaq meeqqat atualinnginneranni. Taamatummi ukioqarneranni iluatsitsilluarnerusoqartarmat.
- Meeqqap nukanganeranit angajoqqaat qanimut suleqatigineqarnerisigut angajoqqaat nukissaqarnerulersinneqassapput, taamaalillutimmi suliatigut ilisimasalimmik siunersiueqateqartarneq siusissukkut ilisimasaqarfigilissavaat, taamalu ilisimasalinnik suleqateqarnermik toqqissisimanartitaqalerlutik, politikkimi allassimavoq.
Suliniutissatut allattorsimaffik immikkoortunik ukunanna tallimanik imaqarpoq:
1. Pinaveersaartitsineq: Tassani ilaatigut pineqarput angajoqqaatut akisussaassuseqarneq pillugu oqaloqatiginnittoqartassaaq, angerlarsimaffimmi eqqissiviilliortoqartillugu politiit suleqatigalugit oqaloqatiginnittoqartassaaq, ukioqanngitsuniit marlunnik ukiulinnut angjoqqaat angerlarsimaffimmi siunnersorlugillu ilitsersorneqartassapput.
2. Suliniutit: Tassani ilaatigut pineqarput ilaqutariinnik katsorsaasarnissaq, peqqissaasarnissaq, inuusuttut atornerluisuunerannik katsorsaasarnissaq aamma naartusut ulloq unnuarlu neqeroorfigineqartarissaat.
3. Attaveqaatitut ilaqutariittut paaqqutaqartarneq: Tassani aanaakkut, qatanngutit, akkakkut, ajakkut, illuusaqqakkut, sanilerisast ilaqutariilluunnii attaveqaataasartut pineqarput.
4. Ilaqutariit paarsisartut: Tassani meeraq ingerlaannartumik angerlarsimaffiup avataanut inissinneqartussaatillugu ilaqutariit meeqqamik tigusigasuarsinnaasut pineqarput. Piffissaq ungasinnerusoq eqqarsaatigalugu ilaqutariinnut inuussutissarsiutigalugu paarsisartunut ilaqutariinnulluunniit oqilisisaasussanut inissiisarnissat matumani pineqarput.
5. Ulloq unnuarlu paaqqinnittarfiit allamik periarfissaarunnermi atorneqartassapput.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...