Meeqqat atugaannik isorinninnerup kingorna D isummersuisoqatigiinnik pilersitseqquvoq

Isummersuisoqatigiinnik pilersitsigitsi, politikerinik kiisalu kommuninit, politiinit ingerlatsivinnillu namminersortunit, meeqqanik inuusuttunillu sullissisunit, inuttalimmik.

Qaasuitsup Kommuniani sumiginnaaneq pillugu annertuumik oqallinnerup kingorna partii naalakkersuisooqataasoq Demokraatit taamatut kajumissaarivoq.

Naammanngilaq

Isummersuisoqatigiit ataatsimiititalianut pioreersunut il.il., ullumikkut atuutereersunut, attuumassuteqaratik sulissapput.

– Isumasioqatigiinnik pilersitsinissamut tunngaviuvoq sukkanerusumik sulisoqarsinnaammat, aammalu ajornartorsiutit maannakkorpiaq atuuttut oqaluuserineqarsinnaammata. Periusitoqqat qimattariaqalerput ikiuutaasinnaasullu suulluunniit qujarullugit. Ullumikkutut iliuuseqartarneq naammanngilaq, partiip ilaqutariinnut oqaaseqartartua Tillie Martinussen erseqqissaavoq.

Akunnerit 24-t?

Demokraatit sammisassat arlallit, isummersuisoqatigiit sammisinnaasaat, namminneq tikkuarpaat:
– Kommunini tamani sulianik suliarinnittoqassava meeqqat inuusuttullu pillugit nalunaarutaannavinnik suliaqartussanik?
– Inatsisiliussaagut, meeqqanik inuusuttunillu 18-it inorlugit ukiulinnik assersuutigalugu kinguaassiuutitigut atornerlunneqarnerannik nakuuserfigineqarnerannilluunniit pasillertoqarpat nalunaaruteqartoqarpalluunniit, akunnerit 24-t iluanni kommunit qisuariartassasut?

Sinaakkutassat nutaat

Partiip erseqqissarpaa sinaakkutassatigut pioreersutigut sukkasuumik aaqqiissutissanik peqanngitsoq.

– Sammisaqarfimmi tamatumani arlalitsigut isumagisassaqarpugut saneqqutaaruminaatsunik, ilaatigut inissiiffissanik amigaateqarneq, sulianik suliarinnittut oqimaatsunik suliallit nikerarnerat, ilaqutariinnullu centerini sulisussaaleqineq, imaasiallaannarluta pissarsiarisinnaanngisatsinnik. Taamaattumik pisariaqarpoq allaanerusumik eqqarsalernissaq, iliuuseqarnissamut periarfissanik arlalinnik amigaateqaratta, Tillie Martinussen erseqqissaavoq.