Meeqqat atuarfiini ineriartortitsinissaq pillugu oqaloqatiginnittalernissaq politikerip kissaatigaa
Danskit meeqqat atuarfiisa ineriartortinnissaanut nutaamik periusissiorniarnerat Aqqa Samuelsenip isumassarsiorfigaa. Danskimmi meeqqat atuarfiini pitsaassutsimut nalunaarusiat atorunnaarlugit atuarfinni pisortat ineriartortitsinissaq pillugu oqaloqatigineqartalissapput.
Meeqqat atuarfiisa ineriartortinnissaanut danskit iliuuserinialigaat isumassarsiorfigissallugu pitsaasuuvoq, nunatsinni atuarfeqarneq inerisarneqassappat atuartullu angusaat pitsanngorsarneqassappata.
Kommune Qeqertalimmi kommunalpolitikeri Aqqa Samuelsen (S) taama isumaqarpoq.
Meeqqat atuarfiini atuartut angusaat atuarfiillu pitsaassusaat, pitsaassutsimut nalunaarusianngorlugit ullumikkut kommunalbestyrelsemut saqqummiunneqartarput. Tamanna Danmarkimut nunatsinnullu atuuppoq.
Ukioq atuarfiusorli nutaaq aallartippat Danmarkimi meeqqat atuarfiini pisortat atuarfiup ineriartortinnissaa pillugu kommunimit oqaloqatigineqartalissapput. Folkeskolen.dk taama allappoq.
Taama periuseqarneq nunatsinni atulissasoq Aqqa Samuelsenip kissaatigalugu tusagassiorfinnut nalunaaruteqarluni allappoq.
- Meeqqat atuarfiini pitsaassutsimut nalunaarusiat arlalitsigut qiviaqqinneqarneq ajortut isumaqarpunga. Meeqqat atuarfiini pitsaassutsimut nalunaarusiortarnermut taarsiullugu atuarfinni pisortat kommunini atuarfeqarnermut aqutsinermi qullersaasuniit kommunalbestyrelsemiillu oqaloqatigineqarnerusariaqalerput, meeqqat atuarfiini siunissamut isigaluni ineriartortitsinissamut pilersaarutit aallunneqarnerunissaat pingaarnerutillugu, Aqqa Samuelsen oqarpoq.
Siunissamut pilersaarutit oqaloqatigiissutigalugit
Danmarkimi atuartitaanermut ministeriaqarfik Folketingimi upernaakkut ataatsimiinneranni inatsisissamik siunnersuuteqarsimapput meeqqat atuarfeqarfiini pisortat ineriartortitsinissaq pillugu oqaloqatigineqartalernissaanik ilaatigut imaqartumik. Atuarfik nammineerluni unammillernartitani pillugit, anguniagassaminillu siunnersuuteqartassaaq, kommunalbestyrelselu sulianut peqataatinneqartassalluni.
Meeqqat atuarfiisa ineriartortinnerat taamaaliornikkut pitsaanerulissaaq, pisortammi namminneerlutik anguniakkanik unammilligassanillu oqaasinnguisinnaalissapput, Qeqertalimmi politikeri isumaqarpoq.
- Taamaalilluni kommunini atuarfeqarfinni nakkutilliinerit oqaloqatigiinneq aallaaviginerulerlugu ingerlanneqalissapput, malitsigisaanillu siunissamut isiginerulissalluni piffissamut kingumut qiviarnerunani. Nunani allani pitsaassutsimut nalunaarusiortarnernut taarsiullugu siunissamut isigaluni meeqqat atuarfiini ineriartortitsinissamut pilersaarutit oqaloqatigiissutigineqartalernerat alloriarfioreerpoq, Aqqa Samuelsen oqarpoq.
Ineriartortitsinissaq pillugu oqaloqatigiinnermi atuarfiit pisortaat namminneerlutik oqaluuserisassanik saqqummiussisassapput. Danskit atuartitaanermut ministeriaqarfiata siunnersuutigisimasaanut susassaqartut arlallit iluarisimaarinnillutik oqariartuuteqarsimapput.