Meeqqat atuarfiata ingerlanerlunnerata akia
Majoriaq, inuusuttunut piukkunnarsaavik, sukumiisumik naliliiffigineqartussanngorpoq. Ingerlatsinermut aningaasartuutit 100 millioner koruunit pitsaanerusumik atorneqarsinnaagaluartut Nivi Olsen Demokraatineersoq oqarpoq
Meeqqat atuarfianniit ilinniagaqaqqinnissamut piareersimanngitsorpassuit Majoriami piukkunnarsartariaqartut inuiaqatigiit ukiumut 100 millioner koruuninik aningaasartuutigisarpaat, AG allappoq.
Inatsisartuni ilaasortaq Nivi Olsen Demokraatineersoq Inatsisartut inuussutissarsiornermut aatsitassanullu ataatsimiititaliaanit ilalerneqarpoq piumasarigamiuk aningaasat taakku pitsaanerusumik atorneqarsinnaanerisa misissoqqissaarneqarnissaa.
Nivi Olsenip naliliinera malillugu annikitsuinnarmik pisariaqartinneqartussaagaluarpoq soraarummeernermi angusat pitsanngorsarsinnarlugit ilinniagaqarnissamut piareersarnissaq.
- Ajoraluartumik amerlasuut Majoriaq 11. klassetut atorpaat. Meeqqat atuarfianneersut amerlanerpaartaat ilinniagaqarnissamut piareersimasariaqaraluarput. Taamaattumik pisariaqarluinnarpoq aningaasaliissutinit taama amerlatigisunit inuiaqatigiit sutigut pissarsisarnersut misissorneqarnissaa. Paasisariaqarparput Majoriap kingorna qassit ilinniakkamik aallartitsisarnersut, Nivi Olsen AG-mut oqarpoq, nangillunilu:
- Aningaasat ilaatigut atorneqarluarsinnaagaluarput atualernissamut piukunnarsarnermut meeqqerivimmiit atualertussanngornermi piareersarnermi. Ajorluinnartumik perorsaasunik amigaateqarneq iluaquserneqassagaluarpoq aningaasat 100 millioner koruunit ilaat perorsaasut akissaataasa pitsanngorsarnerinut atorneqartuuppata.
- Allaaserineqartoq tamakkiisumik aviisimi AG-mi atuarneqarsinnaavoq. Aviisi uani pisiariuk: